Праз контрсанкцыі рэжыму Лукашэнкі ў 2022 годзе беларусы могуць застацца без імпартных харчовых тавараў. У прыватнасці, абмежаванні закрануць мясныя і каўбасныя вырабы, сыры, садавіну і гародніну, а таксама шакалад, цукеркі і печыва. Belsat.eu паказвае, як зменіцца асартымент тавараў на паліцах супермаркетаў пасля таго як харчовае эмбарга пачне дзейнічаць.
Пад забарону павінны трапіць фінскія сыры Valio, італьянскія сыры Biragh, Parmigiano, Grana Padano, Primosale і Zanetti, французскія Ile de France, польскі Radamer, літоўскі Сваля.
Пасля Новага году ў беларускіх крамах ужо нельга будзе знайсці літоўскі сыр Dziugas, а таксама польскія і італьянскія цвёрдыя сыры.
Мусяць знікнуць каўбасы італьянскіх брэндаў Simonini і Beretta, паштэты бельгійскай кампаніі Polca. А вось мясныя вырабы і каўбасы Gourmet або Me Eat Too застануцца – нягледзячы на заходняю стылістыку, гэта насамрэч тавары беларускай вытворчасці.
Знікне таксама іспанская далікатэсная каўбаса Tello.
У 2022 годзе ў беларускіх крамах больш не будзе французскага печыва St Michel і шатландскага Walkers, італьянскай маркі Falcone (печыва) і Balconi (вафлі), галандскай Merba (вафлі) і бельгійскай Desobry (печыва і цукеркі).
Павінны знікнуць з продажу польскія сыры Lazur, La Polle, Radamer і Twoj Smak, французскія Ile de France, Chavroux і Roquefort, літоўскі Dziugas, італьянскі Gorgonzola, а таксама сыры нямецкага вытворцы Kaserei Champignon.
Пастановай Савету міністраў з 1 студзеня 2022 года Беларусь уводзіць эмбарга на харчовыя прадукты з краінаў Захаду. Такім чынам беларускія ўлады адказалі на новыя санкцыі.