Яшчэ адзін спартовы турнір, які павінен быў прайсці ў Беларусі, перанеслі.
Гульню адборачнага гандбольнага турніру жаночага чэмпіянату Еўропы паміж Беларуссю і Нямеччынаю перанеслі. Першапачаткова матч мусіў адбыцца ў Менску 10 кастрычніка, але цяпер пройдзе на стадыёне суперніка ў нямецкім горадзе Трыр у той жа дзень, паведамляе спартовае выданне «Handball-World».
Каманды дамовіліся пра перанос праз цяжкія ўмовы паездкі ў Беларусь для абедзвюх камандаў пасля адпаведных стартавых гульняў у кваліфікацыі чэмпіянату Еўропы.
Чыноўнікі Еўрапейскай федэрацыі гандболу спадзяюцца, што беларуская зборная ўсё ж зможа згуляць у Менску, але не раней, чым у наступным годзе.
Пачынаецца турнір у сераду, 6 кастрычніка, у нідэрландскім горадзе Алмірэ, дзе беларусы згуляюць з чэмпіёнамі свету – Нідэрландамі. У суперніках жаночай зборнай Беларусі па гандболе таксама каманды Нямеччыны і Грэцыі.
АД, belsat.eu