У Марыупалі 9 сакавіка расейскія войскі нанеслі авіяўдар па дзіцячай больніцы, пра гэта паведамляюць мясцовыя ўлады.
«Разбурэнні вялізныя. Корпус, дзе нядаўна лячыліся дзеці, цалкам разбураны», – гаворыцца ў Тэлеграм-канале Марыупальскай гарадской рады.
Кіраўнік Данецкай вайскова-грамадзянскай адміністрацыі Павел Кірыленка заявіў, што авіяўдар быў нанесены падчас «рэжыму цішы». Паводле Кірыленкі, вядома аб 17 параненых, загінулых на момант публікацыі няма.
Кіраўнік Данецкай вобласці дадаў, што на раніцу 9 сакавіка ў Марыупалі колькасць ахвяр сярод мірнага насельніцтва склала 1207 чалавек.
Амаль тыдзень Марыупаль знаходзіцца ў аблозе расейскіх войскаў. У горадзе няма ні святла, ні вады, ні цяпла, ні лекаў, распавёў мэр гораду Вадзім Бойчанка. Паводле украінскіх уладаў, расейскія войскі зрываюць гуманітарныя калідоры і такім чынам перашкаджаюць эвакуацыі мірнага насельніцтва.
