Камітэт Сената ЗША па міжнародных адносінах ухваліў рэзалюцыю аб прызнанні расейскай агрэсіі генацыдам украінскага народу, піша брытанская тэлерадыёкарпарацыя «Бі-бі-сі». Дакумент падтрымлівае правядзенне трыбуналаў над палітычным кіраўніцтвам Расеі.
Рэзалюцыю аб прызнанні расейскай агрэсіі генацыдам украінскага народу, якую ўхваліў камітэт Сената ЗША па міжнародных адносінах, прапанавалі як дэмакраты, гэтак і рэспубліканцы.
«Сваімі дзеяннямі Пуцін вельмі ясна прадэманстраваў, што ягоная мэта – спыніць існаванне ўкраінскага народу. Я асабіста бачыў сведчанні ягонай жорсткасці ў Ірпіні ды іншых раёнах Кіеўскай вобласці», – заявіў адзін з аўтараў рэзалюцыі, сенатар Джым Рыш з Рэспубліканскай партыі.
Дакумент заклікае ЗША, NATO і еўрапейскіх саюзнікаў падтрымаць урад Украіны, каб перадухіліць далейшыя акты генацыду ўкраінскага народу з боку Расеі, а таксама падтрымлівае трыбуналы і міжнародныя крымінальныя расследаванні, каб прыцягнуць да адказнасці расейскае палітычнае кіраўніцтва ды вайскоўцаў, вінаватых у агрэсіўнай вайне, ваенных злачынствах, злачынствах супраць чалавечнасці і генацыдзе. Таксама рэзалюцыя заклікае прэзідэнта ЗША выкарыстоўваць гэтак званы акт Магніцкага супраць датычных да генацыду.
Цяпер гэтую рэзалюцыю вынесуць на ўхваленне Сенатам ЗША.
Раней парламенты некалькіх краінаў абвесцілі Расею спонсарам тэрарызму, такую ж рэзалюцыю прыняў і Еўрапарламент.
Расейскія ўлады неаднаразова адмаўлялі, што іхныя войскі вінаватыя ў якіх-небудзь злачынствах падчас вайны. У Маскве таксама называюць фэйкамі звесткі пра масавыя забойствы цывільных ва ўкраінскіх гарадах.
Сяргей Крот belsat.eu
