«Выстаўце ўльтыматум Лукашэнку». Ціханоўская заклікала ўмяшацца ў сітуацыю з палітвязнямі
Абраная прэзідэнтка Беларусі Святлана Ціханоўская звярнулася да генеральнага сакратара ААН Антонью Гутэрыша і да ўрадаў замежных краінаў з заклікам уратаваць беларускіх палітычных вязняў.
Гэтую заяву дэмакратычная лідарка зрабіла падчас брыфінгу каля амбасады Беларусі ў Літве, прысвечанага рэжыму інкамунікада.
Абраная прэзідэнтка Беларусі ўжо год нічога не ведае пра мужа. Сяргей Ціханоўскі пазбаўлены лістоў, званкоў і сустрэчаў з адвакатам. «Толькі ананімныя лісты, што ён нібыта памёр. І адно тое відэа, дзе я ледзь яго пазнала», – дадала Святлана.
Ціханоўская нагадала, што таксама больш за год няма сувязі з Віктарам Бабарыкам, Максімам Знакам, Марыяй Калеснікавай, Ігарам Лосікам ды іншымі:
«Інкамунікада – гэта спосаб катавання. І гэта катаванне не толькі для палітвязняў, але і для іхных сем’яў. Якія жывуць у поўнай невядомасці і страху, што можа адбыцца найгоршае.
Рэжым Лукашэнкі ўжо забіў пяцярых беларускіх палітвязняў – Ігара Ледніка, Вадзіма Храська, Вітольда Ашурка, Алеся Пушкіна, Мікалая Клімовіча. І працягвае забіваць іншых. Турма – гэта павольная смерць. А смерць у няволі – гэта страшная смерць…
Здавалася, забойства Навальнага ў Расеі мусіла б скалануць міжнародную супольнасць, прымусіць да дзеянняў. Але пакуль мы збольшага чуем толькі словы асуджэння і заклапочанасці», – канстатавала абраная прэзідэнтка Беларусі.
Ціханоўская заклікала генеральнага сакратара ААН Антонью Гутэрыша ўмяшацца ў сітуацыю з палітычнымі вязнямі ў Беларусі:
«Патрабуйце спыніць зверскую палітыку інкамунікада ў беларускіх вязніцах. У вашых сілах уратаваць жыцці людзей. І гэта не палітычнае пытанне, гэта пытанне гуманітарнае. Палітвязням мусіць быць забяспечаны доступ да кваліфікаванай медычнай дапамогі, сувязь з адвакатамі і семʼямі.
Я звяртаюся да ўрадаў замежных краінаў: зрабіце пытанне палітвязняў сваім прыярытэтам. Патрабуйце выкананне запыту Камітэту правоў чалавека ААН да рэжыму аб тэрміновых захады ў справах Віктара Бабарыкі, Максіма Знака і Сяргея Ціханоўскага. Выстаўце ўльтыматум Лукашэнку з патрабаваннем паказаць палітвязняў, якіх трымаюць у рэжыме інкамунікада, і вызваліць іх з турмаў».
Глеб Нержын belsat.eu
