7 верасня стала чарговым днём пратэсту Беларусі супраць фальсіфікацыі ў мінулым годзе прэзідэнцкіх выбараў і гвалту сілавікоў. Сёння з новай сілай загучаў рэлігійны фактар.
Мінская (ня)праўда
Усё пачалося з таго, што дзяржаўная газета «Мінская праўда» апублікавала на першай старонцы карыкатуру на каталіцкіх святароў, якія мяняюць крыж на свастыку. Адначасова там было патлумачана, што тыя ксяндзы, хто не маўчыць супраць гвалту і беззаконня, падтрымліваюць нацыянальны сцяг ды спяваюць гімн «Магутны Божа», – калабаранты ды нацысты.
У Касцёле такога падыходу не ацанілі, назваўшы гэта пляўком у твар мільёнаў каталікоў і ўвогуле ўсіх хрысціянаў.
Біскуп Аляксандр Яшэўскі выказаў спадзеў, што «адпаведныя органы дзяржаўнай улады дадуць належную прававую ацэнку дадзенай карыкатуры і публікацыі ў газеце «Мінская праўда», змешчанай у № 68 ад 7 верасня 2021 года, незадоўга да святкавання Дня народнага адзінства».
А біскуп Юрый Касабуцкі наўпрост заступіўся за бел-чырвона-белы сцяг і гімн «Магутны Божа», асудзіўшы разам з тым гвалт і хлусню.
Без «Перспектывы»
Улады між тым працягвалі рэпрэсіі і супраць іншых катэгорыяў. Яны прыйшлі да праваслаўнага святара Дзіянісія Карасцялёва і журналісткі Кацярыны Пытлевай, выставілі абвінавачанні кіраўнікам БелаПАН Ірыне Леўшынай і Дзмітрыю Наважылаву ды завялі крымінальную справу на галоўнага рэдактара сайту «Виртуальный Брест» Андрэя Кухарчыка.
Філосафа Уладзіміра Мацкевіча прызналі схільным да экстрэмізму, а добрушскага рэпера судзілі за абразу Лукашэнкі. Выпісалі штраф і рэдактарцы «Зялёнага парталу» Яніне Мельнікавай.
Таксама стала вядома, за што быў заблакаваны сайт «Медыя-Палессе». А Вярхоўны суд ліквідаваў аб’яднанне прадпрымальнікаў «Перспектыва».
Між тым «Deutsche Bank» закрывае рахункі найбуйнейшага дзяржаўнага банку – «Беларусбанку», а літоўская мытня не прапускае праз порт у Клайпедзе прадукцыі БелАЗу.
МГ belsat.eu
