Апублікавалі рэндары рэканструкцыі. Гістарычных будынкаў зносіць не збіраюцца.
У траўні адміністрацыя Ленінскага раёну Менску апублікавала папярэднія планы рэканструкцыі некалькіх будынкаў у Лошыцкім парку. 7 жніўня дзяржаўнае інфармагенцтва «Минск-новости» паказала выявы, як мае выглядаць рэканструяваны комплекс былога бровару 1896 года пабудовы.
Рэканструяваць збіраюцца будынкі ля ракі: дом 17 на вуліцы Чыжэўскіх, дамы 5 і 6 на праездзе Чыжэўскіх. Іх даўно збіраліся перарабіць, але зацікаўленых зрабіць там гатэль ці шматфункцыйны комплекс не знайшлося. Цяпер іх пастанавілі ператварыць у Палац шлюбаў – такія планы выношваюць прынамсі пяць гадоў.
Палац мае быць у высокім будынку бровару, у ніжэйшых задумалі зрабіць салон пракату вясельных строяў, цырульню, кавярні, краму кветак. Тэрыторыю вакол збіраюцца ўпарадкаваць, зрабіць алею рэгістрацыі шлюбаў, тэматычныя пляцоўкі, браму, прыстань для чаўноў, паркінг.
Рэканструкцыяй зоймецца скандальна вядомая дзяржаўная кампанія «Менская спадчына». Абяцаюць не зносіць гістарычных будынкаў, але праектаванне яшчэ не завершанае і не ўхваленае. Паралельна з праектаваннем «Менская спадчына» шукае арандатараў будучаму комплексу.
Цяпер колішні бровар у аварыйным стане. Раней у Лошыцкім парку рэканструявалі галоўны будынак Лошыцкай сядзібы: з аварыйнага і фактычна закінутага будынку зрабілі музей, але дзеля гэтага драўляную частку разабралі і сабралі наноў.
Алесь Наваборскі belsat.eu