У Менску развіталіся з першым кіраўніком незалежнай Беларусі Станіславам Шушкевічам
У менскім Архікатэдральным касцёле Найсвяцейшага Імя Марыі ўвечары 6 траўня пачалося развітанне з першым кіраўніком незалежнай Беларусі Станіславам Шушкевічам. 7 траўня цырымонія развітання працягнулася.
Пахавальная імша пачалася а 12-й гадзіне 7 траўня.
Калі выносілі труну, апладысменты доўжыліся больш за 10 хвілінаў. На развітанні ў касцёле не было заўважана ніводнага вянка з дзяржаўнай сімволікаю, піша Радыё Свабода.
Пахавалі Станіслава Шушкевіча на Паўночных могілках Менску.
Першаму кіраўніку незалежнай Беларусі Станіславу Шушкевічу было 87 гадоў. У канцы красавіка ён трапіў у рэанімацыю пасля перанесенага COVID-19. Праз два дні яго выпісалі з лякарні, але здароўе палітыка было падарванае хваробай.
Станіслава Шушкевіча паклалі ў рэанімацыйнае аддзяленне Рэспубліканскага клінічнага медычнага цэнтру Кіраўніцтва справамі прэзідэнта ў сувязі з наступствамі каронавіруса.
Месяц таму ён перахварэў на о-мікрон, пры тым што апошнія месяцы заставаўся ўдома, і кантакты былі зведзеныя да мінімуму.
Станіслаў Шушкевіч быў сябрам-карэспандэнтам Акадэміі навук, у 1991–1994 гадах – старшынём Вярхоўнага Савету 12-га склікання. Адзін з падпісантаў Белавежскага пагаднення, якое паставіла кропку ў існаванні СССР.
