У Беларусі падпісаны ўказ № 137 «Аб выканаўчых дакументах», у адпаведнасці з якім у краіне спыняецца спісанне сродкаў з рахункаў беларускіх кампаніяў на карысць рэзідэнтаў замежных дзяржаваў, якія здзяйсняюць «недружалюбныя» дзеянні, паведамілі ў прэс-службе Лукашэнкі.
«Дакумент накіраваны на абарону нацыянальных суб’ектаў гаспадарання ад спісання з іх рахункаў сродкаў паводле патрабаванняў рэзідэнтаў замежных дзяржаваў, якія здзяйсняюць у дачыненні беларускіх юрыдычных ці фізічных асобаў недружалюбныя дзеянні», – гаворыцца ў прэс-рэлізе.
Адзначаецца, што ўказ прыпыняе выкананне выканаўчых дакументаў, выстаўленых на карысць такіх рэзідэнтаў. Таксама банкі і іншыя фінансавыя арганізацыі будуць абавязаныя адмаўляць у прыёме плацежных патрабаванняў ад гэтых рэзідэнтаў паводле выканаўчых дакументаў без згоды платніка на аплату.
АД belsat.eu
