На нарадзе з Саветам бяспекі 7 красавіка Аляксандр Лукашэнка вялікую ўвагу надзяліў мірным перамовам паміж Украінай і Расеяй, якую ён падтрымаў у агрэсіі.
«Вайна, яшчэ раз падкрэсліваю, гэта вялікая шкода для Беларусі», – цытуе Лукашэнку ягоная прэс-служба.
Паводле яго, на перамовах павінна прагучаць і пазіцыя Беларусі.
«Не можа быць перамоваў без удзелу Беларусі. Калі вы нас увязалі ў гэта, перш за ўсё заходнія краіны, там, на гэтых перагаворах, зразумела, павінна прагучаць пазіцыя Беларусі», – заявіў Лукашэнка.
Ён падкрэсліў, што «ніякіх сепаратных за спінай Беларусі дамоўленасцяў быць не можа».
«Мы перакананы, што не толькі інтарэсы і гарантыі бяспекі павінны быць прадугледжаны адносна Украіны і Расеі, але Беларусі, як аднаго з трох славянскіх народаў, зацікаўленых у тым, каб тут былі мір і стабільнасць. Мы лічым, што ўсё роўна, дзе будуць адбывацца ў канчатковым выніку заключныя сустрэчы, але тое, што прэзідэнт Беларусі, кіраўнік дзяржавы павінен удзельнічаць у гэтых перамовах», – сказаў кіраўнік МЗС Уладзімір Макей, перадае БелТА.
Паводле яго слоў, пазіцыя Лукашэнкі даведзеная да Украіны і Расеі.
Раней лідарка дэмакратычных сілаў Беларусі Святлана Ціханоўская заклікала міжнародную супольнасць запатрабаваць поўнага вываду расейскіх войскаў з Беларусі:
«Іх не павінна быць ні на тэрыторыі нашай краіны, ні на тэрыторыі Украіны. Пры любым зыходзе іх прысутнасць у нашай краіне застанецца крыніцай патэнцыйнай турбулентнасці ў рэгіёне».
Паводле яе, «прысутнасць расейскіх войскаў у Беларусі не толькі супярэчыць беларускаму канстытуцыйнаму нейтралітэту, але і стварае пагрозу для ўсёй Еўропы».
Таксама Святлана Ціханоўская зноў нагадала, што Расея выкарыстоўвае беларускую тэрыторыю для атак на Украіну.
ПС belsat.eu