Новыя палітвязні былі асуджаныя ў межах крымінальных справаў, звязаных з абвінавачаннем у выкарыстанні гвалту ў дачыненні міліцыянтаў, з супрацівам і хуліганствам (арт. 363, 364, 366, 339 КК).
Праваабаронцы падкрэсліваюць, што «непрапарцыйна жорсткія дзеянні міліцыі, скіраваныя на спыненне мірных сходаў, нельга разглядаць як законную дзейнасць для абароны і аховы грамадскага парадку». А ў выпадках ужывання ў дачыненні міліцыянтаў справакаванага імі ж гвалту «ў адказ» з боку пратэстоўцаў такія дзеянні варта разглядаць з увагі на цяжкасць прычыненай шкоды здароўю, а таксама як неабходную абарону ад відавочна неправамоцных дзеянняў сілавікоў.
«Гвалт, які быў справакаваны зыходным непрапарцыйным выкарыстаннем фізічнай сілы, спецсродкаў і калі ў дзеяннях абвінавачанага адсутнічаў намер на нанясенне несімвалічнай матэрыяльнай шкоды або шкоды каму-небудзь, дае падставы разглядаць гэтых асобаў у якасці палітычных зняволеных», – падкрэсліваюць праваабаронцы.
Акрамя таго, праваабаронцы адзначаюць, што суды выносяць прысуды, непрапарцыйна жорсткія (не адэкватныя) правапарушэнню, у якім абвінавачваюцца асобы, – у параўнанні з прысудамі, якія выносіліся ў такіх жа катэгорыях справаў па-за палітычным кантэкстам.
На падставе гэтых высноваў праваабарончая супольнасць Беларусі прызнала палітвязнямі наступных людзей:
- Сяргей Базук (асуджаны на 1 год абмежавання волі з накіраванне ў папраўчую ўстанову адкрытага тыпу паводле ч. 1 арт. 339 КК, накіраваны для адбыцця пакарання);
- Сяргей Верашчагін (асуджаны на 5 гадоў пазбаўлення волі паводле арт. 364 КК);
- Андрэй Царонак (асуджаны на 4 гады пазбаўлення волі паводле ч. 1 і 2 арт. 339 КК, арт. 364 КК);
- Міхаіл Юдзін (асуджаны на 4 гады пазбаўлення волі паводле арт. 364 КК);
- Міхаіл Ефімовіч (асуджаны на 2,5 гады пазбаўлення волі паводле арт. 364 КК);
- Вадзім Хіжнякоў (асуджаны на 2,5 гады пазбаўлення волі паводле арт. 364 КК);
- Андрэй Севяртока (асуджаны на 5,5 гадоў пазбаўлення волі паводле арт. 364 КК);
- Канстанцін Паляк (асуджаны на 3 гады абмежавання волі з накіраваннем у папраўчую ўстанову адкрытага тыпу паводле арт. 364 КК, накіраваны для адбыцця пакарання);
- Іван Зянько (асуджаны на 5 гадоў пазбаўлення волі паводле арт. 218, 364, ч. 1 арт. 342 КК);
- Аляксей Драб (асуджаны на 5 гадоў пазбаўлення волі паводле арт. 218, 364, ч. 1 арт. 342 КК);
- Яўген Бароўскі (асуджаны на 4 гады пазбаўлення волі паводле арт. 218, 364, ч. 1 арт. 342 КК);
- Уладзімір Кацкель (асуджаны на 5 гадоў пазбаўлення волі паводле арт. 218, 364, ч. 1 арт. 342 КК);
- Яўген Зашчытаў (асуджаны на 3 гады пазбаўлення волі паводле арт. 364 КК);
- Аляксандр Шаўцоў (асуджаны на 2,5 гады пазбаўлення волі паводле арт. 364 КК);
- Аліна Войцех (асуджаная на 2 гады пазбаўлення волі паводле арт. 364 КК).
Цяпер колькасць палітвязняў у беларускіх турмах вырасла да 337 чалавек.
ІІ belsat.eu
