Украіна 12-ы дзень бароніцца ад расейскага агрэсара. ОНЛАЙН

Украінскі народ 12-ы дзень адбівае атаку расейскага агрэсара. Нападнік абстрэльвае жылыя часткі гарадоў, гінуць мірныя грамадзяне. Захад увёў беспрэцэдэнтныя санкцыі супраць Масквы. Перамовы пра спыненне агню пакуль не прыносяць плёну. Украінская і расейская дэлегацыі плануюць сустрэцца 7 сакавіка за сталом перамоваў трэці раз.

Храналагічна
23:00

Паважаныя чытачы «Белсату»! На сёння мы скочваем онлайн 12-га дня расейскай агрэсіі супраць Украіны. Беражыце сябе!

22:56

Белы дом паведамляе, што Расея абагнала Іран і стала самай падсанкцыйнай краінай у свеце.

22:46

Больш за 2 000 расейскіх вайскоўцаў узялі ў палон ва Украіне, распавёў дарадца кіраўніка МУС Антон Герашчанка.

Загінулых расейскіх вайскоўцаў з пачатку вайны больш за 11 000 чалавек.

22:40

Па дадзеным Мінэнерга Украіны, 742 тысячы ўкраінцаў застаюцца без святла, 238 тысяч – без газу.

22:27

Украіна хоча прамых перамоваў паміж Уладзімірам Зяленскім і Пуціным, заявіў міністр замежных спраў Украіны Дмытро Кулэбу, паведамляе Reuters.

«Наш прэзідэнт нічога не баіцца, у тым ліку прамой сустрэчы з Пуціным. Калі Пуцін таксама не баіцца, няхай прыходзіць на сустрэчу, няхай садзяцца і гавораць», – сказаў Кулэба.

22:09

Зяленскі атрымаў «медаль Свабоды» Рональда Рэйгана

Высокая ўзнагарода адзначае лідарства Зяленскага і нязломнасць духу мільёнаў украінцаў, якія адстойваюць сваё права выбіраць уласную будучыню і натхняюць увесь цывілізаваны свет змагацца за каштоўнасці свабоды і дэмакратыі, якім прэзідэнт Рэйган прысвяціў сваё жыццё.

Амбасадар Украіны ў ЗША Аксана Маркарава атрымала для Прэзідэнта Украіны Уладзіміра Зяленскага «медаль Свабоды» Рональда Рэйгана. Фота: president.gov.ua

Узнагароду «медаль Свабоды» заснаваў Фонд Прэзідэнта Рональда Рэйгана ў 1992 годзе. Яе ўручаюць выдатным сусветным дзеячам за «ажыццяўленне значнага і ўстойлівага ўкладу ў развіццё свабоды ў свеце». За ўвесь час існавання ўзнагароды яе лаўрэатамі сталі ўсяго 10 чалавек.

21:56

21:45

FIFA дазволіла замежным гульцам і трэнерам у аднабаковым парадку прыпыніць кантракты з расейскімі клубамі.

Пры гэтым на гульцоў не будзе накладзенае пакаранне, прадугледжанае рэгламентам FIFA. Яны змогуць прыпыніць дзеянне працоўных дамоваў з клубамі да 30 чэрвеня. Гэта азначае, што футбалісты і трэнеры маюць права падпісаць дамову з іншай камандай без якіх-кольвек наступстваў.

Пастанова была прынятая пасля ўзгаднення з UEFA.

21:39

Украінскія вайскоўцы за апошнюю гадзіну знішчылі два самалёты ворага. Яны былі збітыя каля Кіева.

Пра гэта напісаў галоўнакамандуючы Узброенымі сіламі Украіны Валерый Залужны.

21:38

Журналіст радыё «Свабода» Раман Пагуліч распавёў, як праходзіць эвакуацыя з Ірпіню праз разбураны мост.

21:25

У Жытомірскай вобласці авіяўдары расейскіх войскаў трапілі ў нафтабазу і рэзервуары.

Паведамляецца, што ўсё адбылося каля 20:20. Паводле папярэдніх звестак, ахвяраў і пацярпелых няма.

21:04

Найбуйнейшая ў свеце пляцоўка пошуку працы сярод фрылансераў «Upwork» прыпыняе працу ў Расеі і Беларусі

Паводле прадстаўнікоў платформы, на ёй неўзабаве нельга будзе зарэгістраваць новых акаўнтаў, а ўжо створаныя профілі ліквідуюць 1 траўня. Закрыццё «Upwork» – гэта больш за 100 000 грамадзянаў, якія пазбавяцца працы ў IT.

«Нашыя сэрцы спачуваюць тым, хто пацярпеў ад гэтай бессэнсоўнай вайны, і мы спадзяёмся, што шлях да міру не за гарамі», – гаворыцца ў допісе кампаніі ў Twitter.

20:51

У Мікалаеве падчас абстрэлу ракета трапіла ў казарму, дзе спалі салдаты

8 асобаў загінулі, 8 прапалі, 19 атрымалі раненні, паведаміў губернатар Мікалаеўскай абласной дзяржаўнай адміністрацыі Віталь Кім.

20:48

Адміністрацыя прэзідэнта ЗША гатовая ўвесці забарону на імпарт расейскай нафты ў ЗША без удзелу супольнікаў у Еўропе, паведамляе «Reuters».

20:19

Дарадца кіраўніка Офісу прэзідэнта Украіны Міхайла Падаляк расказаў пра вынікі трэцяга раўнду перамоваў:

«Трэці раўнд перамоваў завяршыўся. Ёсць невялікія станоўчыя зрухі ў паляпшэнні лагістыкі гуманітарных калідораў… Пра базавы палітычны блок урэгулявання разам са спыненнем агню і гарантыямі бяспекі інтэнсіўныя кансультацыі працягнутыя».

20:06

Пры спробе пераходу мяжы з Польшчай затрымалі дэпутата Яўгена Шаўчэнку, паведамляюць расейскія СМІ. Ён не меў права пакідаць краіну, бо мае прызыўны ўзрост, згодна з указам аб мабілізацыі.

Паводле папярэдняй інфармацыі, супрацоўнікі СБУ даставілі яго ў Кіеў.

Пасля выбараў прэзідэнта Беларусі ў 2020 годзе дэпутат Шаўчэнка неаднойчы сустракаўся з Лукашэнкам і быў частым героем прапагандысцкіх сюжэтаў.

19:46

Трэці раўнд перамоваў Расеі і Украіны завяршыўся ў Белавежскай пушчы, заявілі ў пасольстве РФ у Беларусі.

19:38

У Тбілісі пачаўся мітынг дзеля падтрымання Украіны

Раней арганізатары агучылі патрабаванні: увядзенне візавага рэжыму для расейцаў, забарона расейскіх дзяржканалаў, закрыццё паветранай прасторы для Расеі.

Гэтыя патрабаванні былі выстаўленыя, бо расейцы пачалі масава эміграваць у Грузію.

Мітынг у Тбілісі дзеля падтрымання Украіны. Фота: ekho_kavkaza / Telegram

19:30

Міністр замежных справаў Дмытро Кулэба заявіў, што падтрымаў ініцыятыву міжнароднай навуковай супольнасці ў стварэнні спецыяльнага трыбуналу для разгляду справы аб злачынстве расейскай агрэсіі супраць Украіны.

Удзел у стварэнні трыбуналу возьме кааліцыя дзяржаваў.

19:25

Еўразвяз пачаў працэдуру разгляду заявак на ўваход у ЕЗ Украіны, Грузіі і Малдовы, паведамляе AFP.

19:05

У Мэлітопалі (Запарожская вобласць) расейскія войскі захапілі гарадскую тэлевышку і вышкі радыёсувязі, паведаміў мэр гораду Іван Фёдараў.

Ён дадаў, што праз гэта ўкраінскія ўлады не кантралююць ні відэа-, ні радыёкантэнту.

19:01

ЗША і ЕЗ спынілі пастаўляць у Расею долары і еўры гатоўкаю

Выключэннем будуць выпадкі, калі «гэта неабходна для асабістага выкарыстання фізічнымі асобамі, якія падарожнічаюць у Расею, або найбліжэйшымі чальцамі іхных сем’яў, якія падарожнічаюць з імі», паведамляе УНІАН.

 

18:41

У Дубліне мужчына цяжкавіком пратараніў вароты расейскага пасольства падчас акцыі пратэсту супраць вайны ва Украіне.

Мужчына назваўся «звычайным літрымскім рабочым». Ён пакінуў фота разбурэнняў, учыненых Расеяй ва Украіне і здаўся паліцыянтам.

«Я хачу, каб гэты пасол і ягоныя калегі ўбраліся з нашае краіны, свабоднай краіны. Цяпер час казаць пра гэта».

18:23

Маскоўскі шасцікласнік выказаўся на ўроку гісторыі супраць вайны ва Украіне, а затым крыкнуў у калідоры «Слава Украіне!».

Пасля гэтага да яго дадому прыйшлі паліцыянты, 12-гадовы хлопчык быў удома адзін і не адчыніў, сілавікі адключылі яму электрычнасць.

«Я сядзеў на ложку і думаў, што зараз будзе, – распавядае школьнік Кірыл. – Але не баяўся. Мне нават цікава было, што ў іх там адбывалася. Як яны там вызначаюць: вось у нас тут 12-гадовы хлопчык сваю думку выказаў, дык давайце мы да яго дадому прыйдзем. Вось ён нам не адчыняе, давайце яму святло адключым».

Маці школьніка выклікалі ў камісію ў справах непаўналетніх, паведамляе «Новая газета».

18:13

УСУ кантралюе 70 % тэрыторыі Ірпіню

Пра гэта заявіў мэр Ірпіню Аляксандр Маркушын.

«Была інфармацыя, што Ірпінь цалкам пад кантролем расейскіх войскаў. Я афіцыйна гэта адмаўляю. У 30 % нашага гораду ўвайшлі расейскія войскі. Але ўся астатняя частка застаецца пад кантролем нашых Узброеных сілаў. Ірпінь трымаецца і параўнальны з Данецкім аэрапортам, а абаронцы гораду – з «кібаргамі», – сказаў Маркушын.

Ён таксама нагадаў, што цяпер штораніцы а 10-й гадзіне адбываецца эвакуацыя жыхароў гораду аўтобусам праз Раманаўскі мост.

17:58

Расейцы нанеслі авіяўдар па вёсцы Макараў, што месціцца блізу 50 кіламетраў на захад ад Кіева, у бок Жытоміру. Снарад трапіў на тэрыторыю непрацоўнага хлебазаводу. У выніку авіяўдару загінулі 13 асобаў, яшчэ пяцярых выцягнулі з-пад завалаў жывымі. Паводле папярэдняй інфармацыі, агулам на тэрыторыі заводу было каля 30 асобаў.

17:41

Суд ААН 7 сакавіка адкрыў справу паводле пазову Украіны супраць Расеі і заслухаў довады Украіны. Міжнародны суд у Гаазе прызначыў другое паседжанне на 8 сакавіка, каб даць Расеі магчымасць прывесці свае доказы, але Масква збайкатавала судовае паседжанне.

У Міжнародным судзе заявілі, што прымуць пастанову паводле пазову «як мага хутчэй».

17:29

Намесніца прэм’ер-міністра Украіны Ірына Вэрэшчук паведаміла, што ў закладніках застаюцца замежныя студэнты: расейцы ва Украіне блакуюць іхную эвакуацыю.

Агулам гэта 2046 студэнтаў з 27 краінаў свету. Яны ўсе цяпер затрымаліся ў Сумах праз расейскія абстрэлы.

Індыя – 659 асобаў, Кітай – 160, Турцыя – 144, Нігерыя – 400. Сярод студэнтаў – грамадзяне краінаў Блізкага Усходу, Сярэдняй Азіі, Афрыкі, Паўднёва-Усходняй Азіі, у тым ліку ПАР, Казахстану, Сінгапуру і Саудаўскай Аравіі.

«Ігнаруючы звароты кіраўнікоў гэтых краінаў з просьбаю даць гуманітарныя калідоры студэнтам, расяяне атрымліваюць асалоду ад прыніжэння цэлых краінаў. Нават такіх як Кітай, Індыя, Турцыя. Усё гэта паказвае, што расейскае кіраўніцтва зусім страціла пачуццё рэальнасці. Гэта пачатак канца, які будзе жахлівым. Для расейцаў.

А мы працуем. Калі заўтра атрымаецца адкрыць гуманітарны калідор з Сумаў на Палтаву для жанчын, дзяцей і пажылых людзей, то праз гэты калідор выцягнем і замежных студэнтаў», – паведаміла Ірына Вэрэшчук.

17:20

15-гадовая ўкраінская гімнастка Даніэла Батрона, якая заваявала «бронзу» на дарослым этапе Кубку свету ў дысцыпліне «рознавысокія брусы», адмовілася выходзіць на п’едэстал з расейскімі гімнастамі.

Украінка выйшла з сіне-жоўтым сцягам, і толькі потым узнагароды атрымалі расяянкі.

Учора на этапе Кубку свету па спартовай гімнастыцы расейскі гімнаст Іван Куляк выйшаў на цырымонію ўручэння медалёў за спаборніцтвы ў «паралельных брусах» з літарай «Z» на грудзях. Куляк здабыў «бронзу», турнір выйграў украінскі гімнаст Ілля Коўтун.

17:06

Расейская і ўкраінская дэлегацыі перад пачаткам трэцяга раўнду перамоваў у Белавежскай пушчы.

Паведамляецца, што ў цэлым парадак дня трэцяга раўнду такі ж, як і падчас папярэдніх сустрэчаў: гэта пытанні ўнутрыпалітычнага ўрэгулявання, міжнародныя гуманітарныя аспекты і пытанні ваеннага ўрэгулявання.

16:41

Працягваецца эвакуацыя з Ірпіню. З разбуранага гораду вывелі ўжо больш за 2000 асобаў.

16:35

З пачатку вайны расейскія вайскоўцы пашкодзілі або знішчылі падчас абстрэлаў і бамбаванняў 202 школы, 34 шпіталі і больш за 1,5 тыс. прыватных і шматкватэрных дамоў, паведаміў дарадца кіраўніка Офісу прэзідэнта Украіны Міхайла Падаляк.

16:32

Расея адмаўляецца ад якіх-кольвек «зялёных калідораў», каб прымусіць украінцаў пагадзіцца на «гуманітарку» ад расейскага боку. Пра гэта заявіў дарадца міністра ўнутраных справаў Вадзім Дэнысэнка.

16:28

ЕЗ чакае, што ў краіны супольнасці заедуць каля 5 мільёнаў бежанцаў з Украіны, паведаміў кіраўнік дыпламатыі Еўразвязу Жузэп Бурэль.

16:24

Дэлегацыі Расеі і Украіны пачалі трэці раўнд перамоваў у Белавежскай пушчы

Фота: БелТА

15:53

Ва Украіне запускаюць нацыянальны роўмінг

Гэта значыць, калі сетка аператара недасяжная, можна пераключыцца на сетку іншых аператараў.

Раней Дзяржаўная служба спецыяльнай сувязі і абароны інфармацыі Украіны паведамляла, што абаненты, у якіх недастаткова сродкаў на рахунку, змогуць карыстацца паслугамі. Такая опцыя даступная падчас вайны.

15:46

Прэс-сакратар Пуціна Дзмітрый Пяскоў агучыў афіцыйныя патрабаванні для спынення вайны з Украінай:

  • Украіна мусіць унесці папраўкі ў Канстытуцыю і адмовіцца ад прэтэнзіяў на ўваход у NATO;
  • Украіна мусіць прызнаць Крым расейскім, а таксама незалежнасць так званых ДНР і ЛНР;
  • Расея самастойна завершыць дэмілітарызацыю Украіны.
15:36

Заяўка Украіны на сяброўства ў ЕЗ будзе абмяркоўвацца найбліжэйшымі днямі, заявіў старшыня Еўрапейскай рады Шарль Мішэль.

15:29

Украінская дэлегацыя прыбыла да месца перамоваў з расейскім бокам. Перамовы неўзабаве пачнуцца.

15:19

Журналіст Хрыста Грозэў, са спасылкаю на дзве крыніцы, блізкія да расейска-ўкраінскіх перамоваў, паведамляе змест патрабаванняў Расеі:

  • прызначыць Юрыя Бойку прэм’ер-міністрам;
  • прызнаць ЛНР, ДНР і Крым;
  • адмовіцца ад уваходу ў NATO.

15:11

Наступствы авіяўдару расейскіх войскаў у раёне майдану Герояў Нябеснай сотні ў Харкаве.

Фота: uniannet / Telegram
Фота: uniannet / Telegram

15:08

Улады Вугоршчыны выдалі ўказ, які забараняе пастаўляць з вугорскае тэрыторыі зброю ва Украіну. Пра гэта заявіў прэм’ер-міністр Віктар Орбан.

15:06

У выніку абстрэлу супермаркету ў Харкаве 6 сакавіка загінулі 4 чалавекі, 15 параненыя, паведаміла Харкаўская абласная пракуратура.

«Выяўлена, што 6 сакавіка 2022 года каля 12:00 расейскія вайскоўцы абстралялі артылерыйскімі снарадамі нявызначаных характарыстык супермаркет «Хазар» у Харкаве. У выніку гэтых дзеянняў краіны-агрэсара 4 чалавекі загінулі і больш за 15 чалавек атрымалі раненні. Дакладная колькасць пацярпелых вызначаецца».

Увага, жорсткія кадры!

14:42

Музыка Сяргей Міхалок звярнуўся да вайскоўцаў з Беларусі

13:55

У канцы тыдня магчымая сустрэча міністра замежных справаў Украіны Дмытра Кулэбы з кіраўніком МЗС Расеі Сяргеем Лаўровым. Сустрэча можа адбыцца падчас Анталійскага дыпламатычнага форуму.

13:12

У Крамлі зацвердзілі пералік замежных дзяржаваў, якія «здзяйсняюць у дачыненні Расеі недружалюбныя дзеянні».

У спісе: Аўстралія, Вялікая Брытанія, краіны ЕЗ, Ісландыя, Канада, Ліхтэнштэйн, Манака, Новая Зеландыя, Нарвегія, Карэя, Сан-Марына, Сінгапур, ЗША, Тайвань, Украіна, Чарнагорыя, Швейцарыя, Японія.

Расея склала спіс недружалюбных краін. Хто ўвайшоў?

12:53

Штурман збітага расейскага гелікаптэра Мі-8 заклікаў сваіх таварышаў са службы спыніць вайну і пакінуць Украіну. Відэа з палонным апублікаваў дарадца міністра ўнутраных справаў Украіны Антон Герашчанка ў сваім Telegram-канале.

12:43

«Сябры і сяброўкі, у гэты цяжкі час мы запісалі гэтае відэа, каб паказаць сваю падтрымку Народу Украіны, каб даць зразумець, што мы не ворагі, што нашыя думкі і сэрцы зараз з Украінай, што мы разам і нас не атрымаецца пасварыць», – з такімі словамі Лявон Вольскі прэзентаваў у сеціве новае відэа.

12:20

Дэлегацыі Украіны і Расеі ў дарозе на трэці раўнд перамоваў. Бакі сустрэнуцца а 15:00 на тэрыторыі Беларусі.

11:51

«На нашым сцягу няма крыві. Чорных плямаў, свастык няма і ніколі не будзе. Украінскі сцяг – гэта зямля. Мірны, урадлівы, залаты і без танкаў. Гэтае неба мірнае, чыстае, блакітнае і без ракет. Так яно і было. Так і будзе», – прэзідэнт Украіны Уладзімір Зяленскі запісаў новы відэазварот.

11:43

З 8 сакавіка ў тэлеэфіры «Белсату» будзе выходзіць вечаровае выданне навінаў на ўкраінскай мове.

Ад заўтра навіны на «Белсаце» можна будзе глядзець па-ўкраінску

11:41

Украіна адмовілася ад прапанаваных Расеяй «гуманітарных калідораў», якія павялі б украінцаў у Расею і Беларусь.

Расея, нават пасля таго, як агучыла інфармацыю пра калідоры, працягвае абстрэлы.

11:13

У Міжнародным судзе ААН распачаліся слуханні аб пазове Украіны супраць Крамля ў справе генацыду.

 

11:01

Украінскія вайскоўцы пад Харкавам затрымалі расейскага лётчыка. Пілот бамбардаваў жылыя масівы. Палонны мае званне падпалкоўніка і з’яўляецца намеснікам кіраўніка авіяцыйнага палка ў Варонежы, паведамляе кіраўнік Харкаўскай вобласці Алег Сынэгубаў.

10:46

У Луцку народныя майстры стварылі катапульту для кактэйляў Молатава. Зброю з падручных сродкаў назвалі «ДжаВолина».

10:25

Генеральны штаб Узброеных сіл Украіны прывёў прыкладныя страты праціўніка з 24.02 да 07.03:

  • асабовы склад – больш за 11 000 чалавек
  • танкі – 290
  • баявыя браніраваныя машыны – 999
  • артылерыйскія сістэмы – 117
  • РСЗА – 50
  • сістэмы зенітнай барацьбы – 23
  • самалёты – 46
  • гелікоптары – 68
  • аўтатранспарт / транспартныя сродкі – 454
  • караблі / лодкі / катары – 3
  • паліўныя цыстэрны – 60,
  • БПЛА аператыўна-тактычны ўзровень / БПЛА аператыўна-тактычны ўзровень – 7

Дадзеныя абнаўляюцца. Разлік ускладняецца высокай інтэнсіўнасцю баявых дзеянняў.

09:51

У Чорным моры ўкраінскія вайскоўцы падбілі расейскі вайсковы карабель, заявіў спікер Адэскай абласной вайсковай адміністрацыі Сяргей Братчук.

 

09:35

Гомельскі «Флагшток» заўважыў, што ў вагонах без адмысловых пазначэнняў ляжаць нейкія ракеты. «Беларускі гаюн» пазнаў: гэта ракеты для ЗРК «Бук» і «Аса».

09:28

Расейскія захопнікі расстралялі кіраўніка Гастомэльскай суполкі Юрыя Прылыпку. Разам з Русланам Карпэнкам і Іванам Зарою Юрый Прылыпка раздаваў хлеб і лекі хворым. Акупанты забілі мужчынаў.

09:17

Злучаныя Штаты Амерыкі размесцяць дадатковыя падраздзяленні ў Літве. Пра гэта заявіў амерыканскі генерал Марк Мілі, паведамляе BNS.

ЗША перакінуць у Літву дадатковыя падраздзяленні з радарамі і сістэмамі СПА

09:05

У Расеі 6 сакавіка за ўдзел у антываенных акцыях сілавікі затрымалі амаль 5000 чалавек, паведамляе «ОВД-Инфо».

08:31

У выніку начнога абстрэлу Харкаўскай вобласці, паводле папярэдняй інфармацыі, загінулі 8 чалавек. Расейскія вайскоўцы знішчылі шматпавярховыя дамы, адміністрацыйныя будынкі, медычныя ды навучальныя ўстановы, інтэрнаты.

08:18

З пачатку ўварвання Расеі ва Украіну разбураныя або пашкоджаныя 211 школаў.

08:17

Патрыярх Маскоўскі і ўсяе Расеі Кірыл у пропаведзі напярэдадні Вялікага посту ў сабор Хрыста Збаўцы ў Маскве закрануў тэму Украіны ды распавёў, што стала прычынай уварвання расейскіх войскаў.

Патрыярх у сваёй пропаведзі толькі раз згадаў Украіну, але маліцца за яе не заклікаў. Прычынаю «пагаршэння палітычнай сітуацыі на Данбасе» сталі, паводле яго, гей-парады.

08:13

Пэнтагон лічыць, што Расея задзеяла 95 % сілаў і сродкаў, якія раней сканцэнтравала каля межаў Украіны да пачатку ўварвання (папярэдняя ацэнка, два дні таму, была 92 %), паведамляе Бі-Бі-Сі.

Але нават нягледзячы на гэта, прасоўвання расейскіх войскаў за апошнія содні не адбылося.

 

07:58

Міністэрства абароны РФ паведамляе: згодна з просьбаю прэзідэнта Францыі Эманюэля Макрона, які раней размаўляў з Пуціным, з Кіева, Марыупалю, Харкава і Сумаў з 10:00 (паводле маскоўскага часу) будуць адкрытыя гуманітарныя калідоры.

07:56

Прэзідэнт Польшчы Анджэй Дуда паразмаўляў з прэзідэнтам Украіны Уладзімірам Зяленскім.

«Прэзідэнт Зяленскі сказаў мне, што каля Кіева ўвесь час гуртуюцца расейскія войскі і танкі. Але ні энтузіязму, ні гатовасці да штурму не назіраецца. Абаронцы сталіцы, наадварот, гатовыя да барацьбы і маюць вялікую матывацыю для адпору ворагу. Любое падтрыманне мае значэнне!» – напісаў прэзідэнт Польшчы ў сваім Twitter.

07:32

Раніцаю 7 сакавіка расейскія нападнікі абстралялі горад Мікалаеў з рэактыўных сістэмаў залпавага агню, піша УНІАН. Жыхары гораду паведамляюць, што выбухі чуваць ува ўсіх раёнах і нібыта адразу ў двух кірунках.

07:20

Аператыўная інфармацыя Міністэрства абароны Украіны адносна расейскага ўварвання.

  • З пачатку дня расейскія акупанты працягвалі наносіць ракетна-бомбавыя і артылерыйскія ўдары па паселішчах Украіны.
  • Для нанясення авіяўдараў па Украіне захопнікі працягваюць выкарыстоўваць аэрадромную сетку Рэспублікі Беларусь.
  • Акупанты парушаюць нормы міжнароднага гуманітарнага права, абстрэльваюць мірных жыхароў, зялёныя калідоры, бяруць у закладнікі жанчын і дзяцей, размяшчаюць тэхніку, боепрыпасы ў жылых раёнах гарадоў, штучна ствараюць гуманітарны крызіс у акупаваных мясцовасцях.
  • Горад Ірпінь больш за тры дні застаецца пазбаўлены святла, вады і цяпла, няма харчавання і вады, акупанты забаранілі гараджанам пакідаць свае дамы.
  • Шмат выпадкаў пастаноўкі рэпартажаў для расейскіх тэлеканалаў пра нібыта чалавечнасць захопнікаў. Таксама ў сацыяльных сетках праціўнік працягвае распаўсюджваць створаны ад першай асобы кантэнт, які негатыўна асвятляе дзейнасць Узброеных сілаў Украіны.
  • Група сілаў абароны Украіны праводзіць абарончую аперацыю на ўсіх напрамках наступу праціўніка. Захопнікі працягваюць зазнаваць вялікія страты ў жывой сіле, наземнай тэхніцы і сродках паветранага нападу. Здаюцца ў палон.
07:16

Папа Рымскі Францішак са словамі «вайна – гэта вар’яцтва, калі ласка, спыніцеся» заклікаў спыніць вайну ва Украіне, піша Бі-Бі-Сі.

«Ва Украіне цякуць рэкі крыві і слёзаў. Гэта не проста вайсковая аперацыя, а вайна, якая нясе смерць, разбурэнні і галечу», – сказаў Папа Рымскі Францішак.

07:13

Кангрэс ЗША гатовы вылучыць Украіне $ 10 мільярдаў, піша ТАСС.

Падпісвайся на telegram Белсату

Hавiны