Да вялікай колькасці загінулых падчас землятрусу ў Турцыі прывялі некалькі фактараў, піша навуковы партал phys.org. Сярод прычынаў – слабая канструкцыя дамоў, пабудаваных без уліку пагрозы падземных штуршкоў.
Землятрус магнітудай 7,8 адбыўся ў Турцыі ўначы ў панядзелак. У гэтай краіне, а таксама ў суседняй Сірыі, паводле апошніх звестак, загінулі амаль 5000 асобаў.
Маштабныя разбурэнні выкліканыя сілай землятрусу і тым, што ён адбыўся ў густанаселенай мясцовасці. Штуршкі пачаліся ўначы, калі людзі спалі, і яны апынуліся ў пастцы ў разбураных дамах. Трэцяя прычына – канструкцыя дамоў, якія будаваліся без уліку сейсмаактыўнасці рэгіёну, заявіў ганаровы навуковы працаўнік Брытанскай геалагічнай службы Роджэр Масан.
Ён адзначыў, што ў гэтых мясцінах сур’ёзных землятрусаў не было 200 гадоў і людзі забыліся пра небяспеку. Паводле эксперта, менавіта праз шматгадовае зацішша цяперашнія штуршкі былі асабліва моцнымі, бо ўвесь гэты час на Усходне-Анаталійскім разломе назапашвалася энергія.
Эпіцэнтр землятрусу быў ля Газі’антэпу, але ў гэтым выпадку важны не эпіцэнтр, а тое, як далёка працягнуўся разрыў уздоўж лініі разлому, а ён склаў каля 100 км.
«Гэта азначае, што ў любым месцы ў радыусе 100 кіламетраў уздоўж лініі разлому фактычна ёсць эпіцэнтр землятрусу», – падкрэсліў адмысловец.
У 2004 годзе ўлады Турцыі ўхвалілі закон, які прадугледжваў будаўніцтва новых дамоў паводле сучасных стандартаў устойлівасці. Кіраўніца Інстытуту для зніжэння рызыкі і бедстваў Універсітэцкага каледжу Лондану Джаўэна Фор Ўокер заклікала Турцыю праверыць, ці выконвалася гэтае заканадаўства. Яна таксама заявіла, што неабходна прааналізаваць, ці магчыма ўмацаваць старыя будынкі.
Сяргей Крот belsat.eu