Ранкам 6 кастрычніка чатыры расейскія самалёты Ту-22М3 нанеслі авіяцыйны ўдар з тэрыторыі Беларусі па Украіне, заявіў выданню «Українська правда» намеснік начальніка галоўнага аператыўнага ўпраўлення Генеральнага штабу Збройных сілаў Украіны Аляксей Громаў.
Прадстаўнік Паветраных сілаў Украіны Юрый Ігнат дадаў, што вядзецца пра ўдар па Хмяльніччыне, нанесены ракетамі Х-22. У выніку таго ўдару не было загінулых, пацярпелых і руйнаванняў, адна ракета ўпала на пустыр, другая ўпала каля інфраструктурнага аб’екту. Аляксей Громаў дадаў, што выкарыстанне авіяцыі з беларускага напрамку было ўпершыню з 28 жніўня.
Праект «Беларускі Гаюн», які сочыць за дзеяннямі расейскіх войскаў у Беларусі, не ўпэўнены, што ўдар быў менавіта з Беларусі. Ранкам у Мазырскім і Петрыкаўскім раёнах Гомельскай вобласці мясцовыя жыхары чулі нейкія гукі, падобныя да выбухаў ці запускаў ракет, у той жа час з аэрадрому ў Баранавічах падымаўся самалёт-знішчальнік. Але крыніцы «Гаюна» кажуць, што знішчальнік не праводзіў ракетных запускаў, а мог вылятаць на перахоп патэнцыйных парушальнікаў паветранай прасторы.
Звычайна «Гаюн» публікуе звесткі, якія не супярэчаць заявам ЗСУ. Напрыклад, падчас мінулага авіяўдару з беларускай паветранай прасторы «Гаюн» не толькі называў час і месца пускаў, але і публікаваў перахоп размоваў расейскіх пілотаў.
У першай фазе поўнамаштабнага расейскага нападу на Украіну расейскія войскі ішлі ў тым ліку з тэрыторыі Беларусі. Калі напад на кіеўскім напрамку праваліўся, Расея працягвала абстрэлы Украіны з беларускай зямлі і паветранай прасторы. За першыя тры месяцы поўнамаштабнай вайны ва Украіне з тэрыторыі Беларусі было больш чым шэсць сотняў пускаў, але з красавіка інтэнсіўнасць спадала, з канца траўня большасць пускаў была з паветранай прасторы. З ліпеня абстрэлы Украіны сталі зусім рэдкімі, але ў канцы жніўня прайшла хваля абстрэлаў.
Алесь Наваборскі belsat.eu