Беларускія вайскоўцы ўвайшлі ў склад «міратворцаў» АДКБ для Казахстану. Па іх ляціць самалёт са Пскова
Колькі беларускіх вайскоўцаў і з якіх войскаў паляціць дапамагаць такаеўцам, невядома.
Арганізацыя дамовы аб калектыўнай бяспецы абвясціла пачатак «міратворчай місіі» ў Казахстане, піша расейскі «Коммерсантъ». Вайскоўцы будуць дапамагаць кіраўніку дзяржавы Касым-Жамарту Такаеву змагацца з масавымі пратэстамі, што пачаліся 2 студзеня.
У склад «міратворцаў» увайшлі байцы расейскіх паветрана-дэсантных войскаў, а таксама вайскоўцы з Беларусі, Арменіі, Таджыкістану і Кыргызстану.
Сакратарыят АДКБ заяўляе, што расейская вайскова-транспартавая авіяцыя ўжо перакідвае расейскую частку «міратворцаў» у Казахстан, часткова расейскія «міратворцы» ўжо «прыступілі да выканання задачаў». Расейскі бок сцвярджае, што «міратворцы» АДКБ будуць не толькі ахоўваць вайсковыя і дзяржаўныя аб’екты, але і «спрыяць сілам правапарадку».
У Беларусь, як заўважыў блогер Антон Матолька, ляціць ужо другі вайсковы транспартавы самалёт з расейскага Пскова, а да аэрадрому ў Мачулішчах едуць грузавікі з вайскоўцамі і дзве машыны сілаў спецыяльных аперацыяў.
Беларускія дзяржаўныя медыі не раскрываюць падрабязнасцяў беларускага ўдзелу ў «выкананні інтэрнацыянальнага доўгу», а толькі цытуюць расейскія дзяржаўныя медыі.
АА belsat.eu
