Ініцыятыва «Лісты ў клетачку», якая адпраўляла лісты палітычным вязням, абвясціла спыненне сваёй працы праз тое, што ўжо больш за паўгода наагул не атрымлівае адказаў на лісты палітзняволеным.
«Апошні час, ужо больш за паўгода, мы не атрымліваем адказаў. Наагул. Гэта вельмі засмучае і ставіць пад сумнеў сэнс і карыснасць нашай працы. У тых, хто выходзіць на волю, мы цікавімся, ці атрымлівалі яны нашыя лісты. І даволі часта аказваецца, што не атрымлівалі. Нам вельмі не хочацца проста спансараваць «Белпошты» і выкідваць у сметніцу тысячы канвертаў і лістоў, а таксама марнаваць грошы людзей і час валанцёраў.
Валанцёраў, якіх застаецца ў краіне ўсё менш, а палітвязняў усё более. Нам не стае рук і рэсурсаў аператыўна апрацоўваць лісты, а таксама на менеджмент заданняў, якія разрастаюцца. На жаль, у такіх умовах мы не можам справіцца з гэтымі выклікамі і пастанаўляем закрыць ініцыятыву», – напісалі арганізатары ў Telegram.
За паўтара года працы ініцыятыва атрымала 18 тысячаў лістоў і адправіла большую частку з іх. Праект пачынаўся тады, калі палітвязняў было каля двухсот, а сёння іх ужо 1327 асобаў.
«Дзякуй усім, хто нас падтрымліваў і пісаў лісты. Дзякуй усім, хто ахвяраваў. Працягвайце гэта рабіць праз іншыя рэсурсы: пісаць асабіста, дасылаць паштоўкі, тэлеграмы. Гэта вельмі важна для палітвязняў! Кожны з лістоў, якія прарваліся, – вялікая радасць і прамень цяпла і свабоды», – піша ініцыятыва.
Аднак па-ранейшаму працуе сайт politzek.me, сэрвіс «письмо.бел» і ініцыятыва «Майстэрня паштовак салідарнасці». Адрасы палітычных вязняў застаюцца ў табліцы і на сайце «Вясны».
Алена Рувіна belsat.eu