Прэзідэнт Расеі Уладзімір Пуцін папрасіў прабачэння за каментары свайго міністра замежных справаў, які заявіў, што Адольф Гітлер мае габрэйскае паходжанне. Такое паведамленне прэм’ер-міністра Ізраілю Нафталі Бэнэта прыводзіць «Reuters».
Пасля тэлефоннай размовы з Пуціным Бэнэт падзякаваў яму за ўдакладненне пазіцыі.
У Крамлі заявілі, што Пуцін і Бэнэт з нецярплівасцю чакаюць гадавіны 9 траўня, калі Расея ўшаноўвае перамогу над нацыстамі ў Другой сусветнай вайне, «падкрэслілі асаблівае значэнне гэтай даты для народаў абедзвюх краінаў, якія беражліва захоўваюць гістарычную праўду аб падзеях тых гадоў і ўшаноўваюць памяць усіх загінулых, у тым ліку ахвяраў Галакосту».
Бэнэт таксама паведаміў, што папрасіў Пуціна разгледзець магчымасць эвакуацыі металургічнага заводу «Азоўсталь» ва ўкраінскім порце Марыупаль. Бэнэт сказаў, што зрабіў такую просьбу пасля ранейшай размовы з прэзідэнтам Украіны Уладзімірам Зяленскім. Пуцін жа ў сваю чаргу заявіў падчас «дбайнага абмену думкамі аб сітуацыі ва Украіне», што Кіеў павінен загадаць украінскім байцам, якія схаваліся на велізарным заводзе «Азоўсталь», скласці зброю.
МГМ, belsat.eu