Аналіз спадарожнікавых здымкаў абвяргае сцвярджэнні Расеі аб тым, што забойствы мірных жыхароў у Бучы адбыліся пасля таго, як расейскія салдаты пакінулі горад. Пра гэта паведамляе «The New York Times».
Пасля з’яўлення здымкаў целаў загінулых мірных жыхароў, якія ляжаць на вуліцах Бучы, са звязанымі рукамі і з агнястрэльнымі раненнямі ў галаву пасля сыходу расейскіх вайскоўцаў, Міністэрства абароны Расеі стала адмаўляць сваю датычнасць да гэтага. Да таго ж у міністэрстве заявілі, што целы былі нядаўна выкінутыя на вуліцы пасля таго, як «усе расейскія падраздзяленні цалкам сышлі з Бучы» прыкладна 30 сакавіка.
Расея заявіла, што выявы былі «чарговай пастаноўкай», і заклікала да экстранай нарады Рады Бяспекі ААН з нагоды таго, што гэта нібыта «правакацыя ўкраінскіх радыкалаў» у Бучы.
Аднак агляд відэа і спадарожнікавых здымкаў паказвае, што шмат якія цывільныя жыхары былі забітыя больш як тры тыдні таму, калі расейскія вайскоўцы яшчэ кантралявалі горад. На адным відэа, знятым сябрам мясцовай рады 1 красавіка, відаць мноства целаў, раскіданых па вуліцы Яблонскай каля Бучы.
Так, спадарожнікавыя здымкі кампаніі «Maxar Tecnology» паказваюць, што як мінімум 11 з іх былі на вуліцы з 11 сакавіка, калі расейскія вайскоўцы акупавалі горад. Далейшы аналіз паказвае, што аб’екты заставаліся ў такім становішчы больш за тры тыдні.
АД belsat.eu