181 дзень працягваюцца паслявыбарчыя пратэсты ў Беларусі. Улады імкнуцца пакараць ледзь не кожнага ўдзельніка масавых акцыяў, а каб запалохаць людзей, нават разгарнулі хвалю крымінальнага пераследу над нязгоднымі. «Белсат» падводзіць галоўныя вынікі дня.
Напярэдадні пачатку судовага паседжання ў справе затрыманых журналістак «Белсату» Кацярыны Андрэевай і Дар’і Чульцовай Беларуская асацыяцыя журналістаў зладзіла прэс-канферэнцыю. Заяву «Белсату» на ёй агучыў намеснік дырэктара тэлеканалу Аляксей Дзікавіцкі.
«Лічым зняволенне нашых журналістак незаконным. Нашыя рэпарцёркі выконвалі сваю працу – рыхтавалі матэрыялы для тэлеканалу «Белсат». Падчас працы яны добрасумленна і старанна выконвалі ўсе журналісцкія абавязкі. Абвінавачанні на адрас абедзвюх журналістак абсурдныя.
Яны не кіравалі «групавымі дзеяннямі, якія груба парушаюць грамадскі парадак», не арганізоўвалі і не рыхтавалі «дзеянняў, якія груба парушаюць грамадскі парадак». Іх затрымалі 15 лістапада, калі яны асвятлялі жорсткі разгон мірнай дэманстрацыі на месцы затрымання актывіста Рамана Бандарэнкі – чалавека, які зрабіў заўвагу невядомым у цывільным, каб яны не зрывалі беларускай сімволікі. У выніку збіцця ён, не прыходзячы ў прытомнасць, памёр у шпіталі.
Журналісткі вялі рэпартаж пра тое, чаму жыхары Беларусі абураныя смерцю Рамана Бандарэнкі. У гэтым заключаецца журналісцкая праца, і такія дзеянні не павінны карацца ні ў адной краіне свету. Таму мы патрабуем неадкладнага вызвалення журналістак і зняцця ілжывых абвінавачанняў».
Журналісткі «Белсату» Кацярына Андрэева і Дар’я Чульцова застаюцца за кратамі з 15 лістапада. Іх затрымалі за стрым жорсткага разгону падчас акцыі памяці Рамана Бандарэнкі ды разбурэння сілавікамі народнага мемарыялу. Кацярыне і Дар’і выставілі абвінавачанне паводле ч. 1 арт. 342 КК («Арганізацыя і рыхтаванне дзеянняў, што груба парушаюць грамадскі парадак»). Праваабаронцы прызналі журналістак палітвязнямі.
Сёння Менскі гарадскі суд агучыў вырак у справе Паўла Спірына. Блогера пакаралі зняволеннем на 4 гады і 6 месяцаў у калоніі агульнага рэжыму.
Паўла Спірына затрымалі летась 4 верасня. Яго вінавацілі ў распальванні сацыяльнай варожасці (ч. 1 арт. 130 Крымінальнага кодэксу). Нагодаю сталіся два ролікі на ягоным YouTube-канале: «Грань», прысвечаны антынаркатычнаму заканадаўству ў Беларусі (размешчаны 14 чэрвеня 2019 года) і «Жудасная таямніца генпракурора Беларусі: карт-бланш на садызм» (22 жніўня 2020 года), прысвечаны жнівеньскім падзеям. Тут убачылі распальванне сацыяльнай варожасці ў дачыненні работнікаў пракуратуры, суддзяў, дэпутатаў, вышэйшых службовых асобаў і міліцыянтаў, у тым ліку амапаўцаў.
Інжынера-праграміста Сцяпана Чыкілёва, якога 15 лістапада збіў міліцэйскі мікрааўтобус, прызналі вінаватым у зацятым хуліганстве. Суддзя Фрунзенскага суда Менску Наталля Бугук прызнала айцішніка Сцяпана Чыкілёва вінаватым у тым, што ён нібыта пашкодзіў аўтамабіль сілавікоў, і прысудзіла яму 3 гады абмежавання волі з накіраваннем у папраўчую ўстанову адкрытага тыпу («хімія»).
Праграміста судзілі за зацятае хуліганства паводле ч. 2 арт. 339 Крымінальнага кодэксу. На відэа з затрымання бачна, што 34-гадовага айцішніка збіў бус сілавікоў. Людзі ў чорным выскачылі з аўта і зацягнулі Сцяпана Чыкілёва. Пры гэтым сілавікі жорстка збілі мужчыну, ён трапіў у шпіталь.
Гомельскі суд пакараў 15-гадовага падлетка двума гадамі пазбаўлення волі ў спецыяльнай навучальна-выхаваўчай установе закрытага тыпу. Добрушскі юнак быў адміністратарам тэлеграм-каналу «Данные карателей Беларуси». Там ён публікаваў асабістыя звесткі сілавікоў Гомельшчыны. Таксама хлопец прасіў сваіх падпісантаў ахвяраваць грошы на развіццё праекту.
Памочнік пракурора Гомля Ганна Зубарава сцвярджае, што за гэтыя сродкі падлетак быццам бы набыў сабе скутар і вопратку. Цяпер пракуратура хоча спагнаць грошы на карысць дзяржавы. Гэта больш за 1,5 тысячы беларускіх і 5 тысячаў расейскіх рублёў.
Па выніках сённяшняга дня праваабаронцы прызналі палітвязнямі 227 асобаў, крымінальных справаў за гвалт з боку сілавікоў дасюль няма.
Судзіць журналістку Кацярыну Барысевіч і лекара Арцёма Сарокіна пачнуць 19 лютага а 10:00 у Доме правасуддзя.
Разгледзіць справу суд Маскоўскага раёну Менску, паведамляе TUT.by. Журналістку і доктара вінавацяць у раскрыцці медычнай таямніцы.
Кацярыну Барысевіч затрымалі 19 лістапада 2020 года. Ёй і доктару БХМД Арцёму Сарокіну выставілі абвінавачанне ў раскрыцці медычнай таямніцы, што прывяло да цяжкіх наступстваў (ч. 3 арт. 178 КК РБ).
Нагодаю стаў апублікаваны артыкул пра тое, што ў крыві Рамана Бандарэнкі не выявілі алкаголю. Гэта разыходзіцца з версіяй СК і асабіста Аляксандра Лукашэнкі.
Следчы камітэт працягвае расследаванне крымінальнай справы па леташніх масавых закалотах у Менску. Кіраўнік менскага ўпраўлення Сяргей Паско распавёў БЕЛТА, што асаблівую ўвагу звярнулі на фінансавы складнік.
Сцвярдажецца, што СК выявіў факты фінансавання «незаконных масавых мерапрыемстваў», у тым ліку гаворка ідзе пра аплату штрафаў па адміністратыўных справах. Яшчэ ў лістападзе арыштавалі рахункі фонду «BY_help», а з картаў беларусаў, якія атрымалі ад яго дапамогу, пачалі знікаць грошы.
«У выніку гэтай дзейнасці асобы, у дачыненні якіх ужыта адміністрацыйнае спагнанне ў выглядзе штрафу, фактычна адказнасці не нясуць. Варта адзначыць, што прынцып індывідуальнай адказнасці, што прадугледжаны адміністрацыйным правам, азначае патрэбу выканання пакарання непасрэдна асобай, якую прыцягнулі да адказнасці. У іншым выпадку значэнне інстытута асабістай адказнасці цалкам нівелюецца», – лічыць Сяргей Паско.
СК belsat.eu