У Стоўбцах да Дажынак знішчаюць мадэрнісцкі драўляны кінатэатр. На яго месцы пабудуюць новы
У Стоўбцах зносяць помнік архітэктуры і візітную картку горада – мадэрнісцкі драўляны кінатэатр «Беларусь», пабудаваны ў 1960-х гадах.
«Помнікі архітэктуры другой паловы XX ст. з’яўляюцца самымі неабароненымі, паколькі не маюць ахоўнага статусу, і ў грамадскай свядомасці яшчэ не выпрацаваўся кансэнсунс аб іх каштоўнасці», – паведамляе тэлеграм-канал «Спадчына».
На месцы кінатэатра да Дажынак, якія пройдуць у 2022 годзе ў Сталбцах, адновяць падобны па архітэктуры абʼект.
Цяперашні будынак кінатэатра выкананы з дрэва, але для будучага будаўніцтва яно дакладна выкарыстоўвацца не будзе. Пры будаўніцтве прыменяць іншыя матэрыялы, паведамляе «Млын.by».
Частку новага кінатэатра па праекце плануюць зрабіць шкляной. «Празрыстым» стане вестыбюль, дзе можна будзе купіць білеты ці пачакаць кінасеанса. У тарцы плануецца размясціць кіназалу на 49 месцаў, гэта для горада з насельніцтвам 17 тысяч чалавек.
АД, belsat.eu
