Беларуса затрымалі 15 лютага, падазраюць у супрацы з беларускай вайсковай выведкай – фатаграфаванні аб’ектаў сістэмы абароны Латвіі. Справу могуць перадаць у суд у верасні.
Генеральная пракуратура Латвіі выставіла абвінавачванне грамадзяніну Беларусі ў шпіянажы на карысць беларускай вайсковай выведкі, піша «Delfi». Яму пагражае да 10 гадоў пазбаўлення волі. Абвінавачаны, як сцвярджаецца, быў завербаваны і навучаны на тэрыторыі Беларусі.
Справу не каментуюць, імя затрыманага не называюць. Расказваюць толькі, што абвінавачаны атрымаў выведную інфармацыю пра прынамсі 17 аб’ектаў дзяржаўнай важнасці – на даручэнне беларускай выведкі рабіў фота і відэа аб’ектаў сістэмы абароны Латвіі, крытычнай інфраструктуры энергазабеспячэння і аб’ектаў цывільнай інфраструктуры.
Служба дзяржаўнай бяспекі Латвіі мяркуе, што звесткі, якія атрымаў меркаваны шпіён, маглі быць важнымі як для Беларусі, так і Расеі – іх маглі скарыстаць у выпадку ваеннага канфлікту з Латвіяй і NATO для дыверсіяў і атак. З паведамленняў у прэсе вынікае, што нейкія звесткі ён перадаў.
Алесь Наваборскі belsat.eu