Казахстан выказаў намер змяніць назву нафты, якая экспартуецца праз марскія парты РФ. Такі крок запланаваны, каб дыстанцавацца ад расейскай нафты, якая трапіла пад санкцыі, паведаміла агенцтва «Reuters».
«У сувязі з нядаўнімі значнымі геапалітычнымі зменамі і каб пазбегчы іх негатыўнага ўплыву на экспарт казахстанскай нафты праз расейскія парты, з чэрвеня 2022 года ўжываецца наступная назва гатунку – KEBCO (Kazakhstan Export Blend Crude Oil)», – цытуе «Reuters» ліст казахстанскай кампаніі «CNPC-Актэбэмунайгаз».
Перайменаванне пацвердзілі яшчэ чатыры крыніцы агенцтва ў нафтавых кампаніях краіны. Паводле іх, змены адбудуцца з панядзелка, 6 чэрвеня.
«Гэта неабходны крок, каб нашая нафта не трапіла пад санкцыі, а ў яе назве выразна была ўказаная краіна паходжання ў дакументах. У адваротным выпадку ў нас будуць праблемы з адкрыццём акрэдытываў», – патлумачыла крыніца «Reuters».
Каля 20 % казахстанскай нафты ідуць транзітам праз расейскія марскія парты, і хоць яна тэхнічна не падпадае пад заходнія санкцыі, гэты экспарт неаднаразова памылкова прымалі за расейскі, кажуць казахстанскія нафтатрэйдары.
Да ўвядзення санкцыяў нафту, здабытую ў Казахстане, змешвалі з расейскай для атрымання стандартызаваных экспартавых гатункаў – Расейскай экспартавай сумесі сырой нафты (REBCO / «Urals») і «Siberian Light». І REBCO, і «Urals» апошнім часам сутыкнуліся з цяжкасцямі пры продажы нафты з прычыны заходніх санкцыяў і абмежаванняў з боку еўрапейскіх кампаніяў.
На гэтым тыдні ЕЗ абвесціў пра ўвядзенне частковага эмбарга на імпарт расейскай нафты з канца 2022 года, у межах якога будзе цалкам забароненае транспартаванне морам.
Раман Лугоўскі belsat.eu
