Прэзідэнты Францыі і Расеі напярэдадні, 3 траўня, пагутарылі праз тэлефон. Гэта была першая тэлефонная размова Эманюэля Макрона з Уладзімірам Пуціным з канца сакавіка. Паводле паведамлення палацу дэ ль’Элізэ, размова доўжылася больш за дзве гадзіны.
Макрон, як паведамляюць, на ягоным афіцыйным сайце, звярнуўся да Пуціна з заклікам забяспечыць далейшую эвакуацыю людзей з заводу «Азоўсталь» у Марыупалі. Пры гэтым Макрон у цэлым ізноў запатрабаваў спыніць агонь ва Украіне і выказаў глыбокую занепакоенасць у сувязі з сітуацыяй у Марыупалі ды на ўсім Данбасе.
У прыватнасці, паводле французскага прэзідэнта, Масква павінна дазволіць мірным жыхарам самым выбіраць, куды іх эвакуююць: у Расею і на кантраляваныя ёй тэрыторыі ці на тэрыторыі, падкантрольныя ўкраінскім уладам.
Макрон заклікаў Расею падняцца да ўзроўню яе адказнасці як сталага чальца Рады Бяспекі ААН і спыніць гэтую разбуральную агрэсію, гаворыцца ў заяве палацу дэ ль’Элізэ.
Таксама Макрон падкрэсліў, што гатовы і далей весці перамовы з Пуціным, каб дабіцца міру пры поўным захаванні суверэнітэту і тэрытарыяльнай цэласнасці Украіны. Прэзідэнт Францыі таксама заявіў, што гатовы разам з міжнароднымі арганізацыямі дабівацца зняцця блакады ўкраінскіх марскіх партоў, каб забяспечыць экспарт сельскагаспадарчых тавараў з Украіны. У Крамлі пацвердзілі, што гэтую тэму абмяркоўвалі.
Як гаворыцца на сайце Крамля, Пуцін павіншаваў Макрона з пераабраннем на пасаду прэзідэнта (Макрон перамог у другім туры выбараў 24 красавіка). Пуцін праінфармаваў Макрона пра «вызваленне» Марыупалю. Таксама з паведамлення вынікае, што Пуцін заклікаў Захад спыніць пастаўкі Украіне ўзбраенняў.
Пуцін сказаў, што Расея адкрыта да «дыялогу» з Украінай, але абвінаваціў Кіеў у «негатовасці да сур’ёзнай працы».
Перамовы прайшлі на фоне паведамленняў пра адступленне расейскіх войскаў на тэрыторыі заводу «Азоўсталь» у Марыупалі і напярэдадні свята 9 траўня, калі, паводле паведамленняў CNN і шэрагу іншых заходніх медыяў, якія спасылаюцца на паведамленні выведкі, Пуцін можа абвесціць інтэнсіфікацыю баявых дзеянняў супраць Украіны, аж да абвяшчэння мабілізацыі.
Макрон – адзін з нешматлікіх заходніх лідараў, хто падтрымлівае кантакт з Пуціным пасля пачатку расейскага ўварвання ва Украіну 24 лютага. З канца сакавіка яны, аднак, не размаўлялі праз тэлефон. Прэзідэнт Францыі заяўляў, што такія размовы даюцца яму цяжка: словам Пуціна давяраць цяжка, акрамя таго, падзеі ў Бучы ды іншых гарадах Украіны, дзе была зафіксаваная масавая гібель мірных жыхароў, паставілі магчымасць дыялогу пад яшчэ большы сумнеў.
ЗК belsat.eu