«Фюрэр у спадніцы»: у Оперным тэатры Беларусі новы генеральны дырэктар

У Оперным тэатры другі раз за год змяніўся генеральны дырэктар. Пасаду заняла былая рэктарка Акадэміі музыкі Кацярына Дулава. Яе прадставіў калектыву міністр культуры Анатоль Маркевіч, паведамляе тэлеканал ОНТ.

Кацярына Дулава. Фота: sb.by

Папярэдні дырэктар Вячаслаў Гарбузоў, які з 2002 да 2009 года працаваў у БРСМ, а пасля ў Берасцейскім аблвыканкаме, быў прызначаны на сваю пасаду 12 траўня 2021 года і не пабыў у ролі дырэктара нават года.

Студэнтка Акадэміі музыкі і былая салістка Опернага Маргарыта Ляўчук распавяла ў сваім Instagram, што нічога добрага ад такога рашэння чакаць не трэба.

«Мае глыбачайшыя спачуванні роднаму тэатру. Дулаву называюць «фюрэрам у спадніцы». Тэатр пры ёй мае ўсе шанцы стаць сапраўдным канцлагерам, як гэта адбылося з Акадэміяй музыкі.

Чысткі няўгодных працягнуцца, будзе шмат ахвяр ва ўгоду ідэалогіі, яна жорсткі кіраўнік. Тыповы персанаж з «1984», – напісала Маргарыта Ляўчук.

Кацярына Дулава ўваходзіць у Канстытуцыйную камісію, а ў 2016–2019 гадах была чальцом Савету Рэспублікі.

«Пік звальненняў іншадумцаў яшчэ наперадзе». Што адбываецца сёння ў беларускай культуры?

АД, belsat.eu

Падпісвайся на telegram Белсату

Hавiны