Хворай на сухоты жанчыне далі год калоніі за тое, што назвала Лукашэнку «казлом»

3 лістапада 2022 года ў судзе Маладзечна і Маладзечанскага раёна суддзя Вадзім Петрусевіч прызнаў Людмілу Самак вінаватай у абразе Аляксандра Лукашэнкі. Жанчыну асудзілі да года пазбаўленні волі ва ўмовах калоніі агульнага рэжыму, паведамляе Праваабарончы цэнтр «Вясна».

Праваабаронцы адзначаюць, што Людміла Самак – жыхарка Крупскага раёну, яна хворая на сухоты, мае хранічны алкагалізм і некалькі судзімасцяў.

У дзень затрымання 19 верасня 2021 года яна ехала ў інфекцыйную лякарню, каб лячыцца ад сухотаў. На чыгуначным вакзале ў Маладзечне жанчына сядзела на лаўцы і ўжывала алкаголь, калі да яе падышлі супрацоўнікі міліцыі. Пры іх яна пачала крычаць, што Лукашэнка «казёл, плаціць сваім міліцыянтам, якія нічога не робяць». Таксама Самак ужывала лаянку. Гэта запісалі прыборы відэафіксацыі, якімі карыстаюцца супрацоўнікі міліцыі.

Старшая памочніца пракурора Юлія Жук прасіла для жанчыны два гады пазбаўлення волі ў калоніі агульнага рэжыму. Аднак суддзя Вадзім Петрусевіч прызначыў удвая меншае пакаранне.