Кіеўская паліцыя: на целе павешанага Віталя Шышова – пашкоджанні, «характэрныя для аднаразовага падзення»
Паліцыя разглядае як версію самагубства, так і версію наўмыснага забойства кіраўніка Беларускага дому ва Украіне.
Раніцай 2 жніўня кіраўнік Беларускага дому ва Украіне Віталь Шышоў выйшаў на прабежку і знік. А зранку 3 жніўня яго знайшлі павешаным на ўскрайку Кіева.
Днём 3 жніўня кіеўскія паліцыянты далі брыфінг аб тым, што вядома ў справе.
Паводле паліцыі, 2 жніўня а 15:18 паступіла два паведамленні, што Віталь сышоў раніцай на прабежку і не вярнуўся дадому. Адразу на месца яго пражывання выехала міліцыя. А на звыклае месца яго прабежак – супрацоўнікі МУС і валанцёры.
Раніцай 3 жніўня пошукі працягнуліся – і было знойдзенае ягонае цела. На месцы трагедыі былі два пянькі і пятля.
Пакуль разглядаюцца дзве версіі: самагубства і наўмыснае забойства, прыхаванае пад самагубства. Вывучаюцца камеры, вядзецца апытанне сведкаў і вывучаецца лад жыцця загінулага.
На целе Віталя ёсць пашкоджанні, але яны адпавядаюць паводле характарыстык «аднаразоваму падзенню». Будуць праводзіцца экспертызы.
За расследаванне ўзяўся славуты журналіст Хрыста Грозэў – кіраўнік аддзелу расследаванняў «Bellingcat». Як ён расказаў расейскаму радыё «Эхо Москвы», ягоная група цяпер перакідвае ўсе свае сілы на раскрыццё забойства (а ў тым, што гэта забойства, ён не сумняецца).
Грозеў заяўляе, што «ў апазіцыйныя беларускія структуры ва Украіне ўкараніліся супрацоўнікі расейскага ФСБ пад прыкрыццём».
МД belsat.eu
