Украінская чыгунка паведамляе, што цягам апошніх дзён беларускія і расейскія чыгункі пачалі звяртацца з запытам пра вяртанне грузавых вагонаў. Намеснік дырэктара дэпартаменту камерцыйнай працы ўкраінскай чыгункі Валер Ткачоў у сваім Facebook паведамляе, што вагоны агрэсарам не вернуць.
Уладальнікі беларускіх і расейскіх грузавых вагонаў пачалі звяртацца ў АТ «Укрзалізныца» з просьбай аб перанакіраванні, або вяртанні рухомага саставу. Але кіраўніцтва ўкраінскай чыгункі вырашыла пакінуць гэтую маёмасць сабе.
«Гледзячы на матэрыяльную шкоду, нанесеную Украіне – краіне-агрэсару (Расеі) і яе саюзніку (Беларусі); а галоўнае, улічваючы тысячы нявінных ахвяраў, забітых захопнікамі – увесь рухомы састаў, грузы і іншае НЕ вернуцца ў краіны-акупанты! Мы ніколі не даруем вам забойства нашых людзей і разбурэння нашых гарадоў і вёсак!», – адзначыў Валер Ткачоў, намеснік дырэктара дэпартаменту камерцыйнай працы ўкраінскай чыгункі.
Telegram-канал «Транспорт Минска» ўдакладняе, што цяпер ва Украіне каля 5 тысячаў грузавых вагонаў беларускай чыгункі.
«БЧ пазбаўляецца каля 5000 (ПЯЦІ ТЫСЯЧ) вагонаў. А гэта – 100 саставаў па 50 вагонаў. Вельмі шмат вагонаў».
3 сакавіка Генеральны штаб Узброеных сілаў Украіны паведаміў, што камандаванне 38-й асобнай дэсантна-штурмавой брыгады Узброеных сілаў Беларусі атрымала загад на перасячэнне мяжы з Украінай. Генштаб піша, што пакуль войскі Беларусі не зайшлі на тэрыторыю Украіны. Беларускія вайскоўцы не жадаюць ваяваць.
АФ belsat.eu