Выданне «Зеркало» паведамляе пра затрыманне жонкі Яўгена Лівянта – Юліі. Гэта здарылася ў той жа дзень, калі схапілі дачку і зяця педагога. Сям’я цяпер у ізалятары на Акрэсціна.
Сілавікі затрымалі жонку педагога, сузаснавальніка навучальнага цэнтру «100 балаў» Яўгена Лівянта. Пра гэта выданню «Зеркало» паведамілі дзве крыніцы, не звязаныя паміж сабою.
Сёння стала вядома пра затрыманне дачкі і зяця педагога: Ганны Лівянт і Мікіты Дразда. Іх схапілі 10 снежня пасля вяртання з Польшчы. У той жа дзень затрымалі і спадарыню Юлію.
Сямʼя цяпер у ізалятары на Акрэсціна паводле абвінавачанняў у адміністратыўных правапарушэннях. Але з «пакаянных» відэа можна зрабіць выснову, што іх вінавацяць як мінімум паводле «народнага» артыкулу аб групавых дзеяннях, што груба парушаюць грамадскі парадак.
На волі засталася другая дачка Яўгена – Галіна Лівянт.
Тым часам стала вядома, што сілавікі затрымалі калегу Яўгена Лівянта – другога сузаснавальніка цэнтру «100 балаў» Аляксея Іванова. У «пакаянным» відэа настаўнік кажа, што браў удзел у акцыі пратэсту ў 2020 годзе і разам з Яўгенам выходзіў на дарогу.
Радыё «Свабода» паведаміла, што Яўгену Лівянту суд даў 14 содняў арышту, Юліі – 15, Ганне – 14. Аляксею Іванову, якога затрымалі 30 снежня, прызначылі 14 содняў.
Пра затрыманне самога Яўгена Лівянта стала вядома 28 снежня. Яго абвінавацілі ў «спробе захапіць уладу шляхам удзелу ў Каардынацыйнай радзе», а таксама ў актыўным удзеле ў дзеяннях, што груба парушаюць грамадскі парадак.
Сяргей Крот belsat.eu