У Барысаве на 2566-м заводзе па рамонце радыёэлектроннага ўзбраення распрацавалі ўзоры электраровару для міліцыі. Яны прызначаны для нясення патрульна-паставой службы ў санаторна-курортнай зоне з працяглымі маршрутамі патрулявання, паведамляе Дзяржкамваенпрам.
Электраровар «Філін-1» можа развіваць хуткасць да 40 км/гадзіна і пераадольваць на адной зарадцы не меней 90 км па перасечанай мясцовасці.
Ровар абсталяваны страбаскопам са зменнымі рэжымамі працы, гучнагаварыцелем, кантэйнерам багажніка для аптэчкі і ёмістасці з вадой. На рулі ўсталяваны кранштэйн з мацаваннем для пераноснай радыёстанцыі.
Два такія электраровары праходзілі выпрабаванні ў Мядзельскім раёне гэтым летам і атрымалі станоўчыя водгукі міліцыянераў.
У Дзяржкамваенпраме адзначылі наступныя перавагі электраровара: арыгінальны дызайн, бясшумнасць перамяшчэння, адсутнасць шкодных выкідаў у атмасферу, прастата абслугоўвання.
Таксама адзначаецца, што веласіпед можа выкарыстоўвацца не толькі для патрульнай службы, але пры нязначных зменах камплектацыі і для працяглых экскурсій, паездак на рыбалку і паляванне.
Алена Рувіна belsat.eu