Не прабыўшы на сваёй пасадзе і двух месяцаў сышла «міністарка» эканомікі і фінансаў у Аб’яднаным пераходным кабінеце Беларусі. Афіцыйная прычына – шматлікія пагрозы з боку зламыснікаў. І хоць у Кабінеце выказваюць падтрыманне Таццяне Зарэцкай, сама структура цяпер сутыкнулася з дадатковымі выклікамі.
2 лістапада стала вядома пра сыход Аб’яднанага пераходнага кабінета Беларусі прадпрымальніцы Таццяны Зарэцкай, якая займала ў ім пазіцыю прадстаўніка ў эканоміцы і фінансах. Як Зарэцкая распавяла сама, за апошнія некалькі тыдняў яна «сутыкнулася з вялізным ціскам» на сябе, сваіх сяброў, родных, супрацоўнікаў, партнёраў і інвестараў.
«Шквал ананімных паведамленняў, лістоў, званкоў, прамыя пагрозы. Я меркавала, што мой уступ у Кабінет можа пацягнуць за сабой пэўныя наступствы. Але не меркавала, што гэта прывядзе да таго, што нападам падвергнуцца мае блізкія і нават тыя людзі, якія не маюць дачынення ні да беларускай палітыкі, ні да Кабінету», – адзначыла цяпер ужо былая прадстаўніца Кабінету.
Паводле яе, пагрозамі ўжо займаецца паліцыя. Тым не менш, заявіла Зарэцкая, зламыснікі фактычна паставілі яе перад выбарам: заставацца ў Кабінеце або сыходзіць. Яна выбрала апошняе.
Ейны сыход стаў нечаканасцю для Аб’яднанага пераходнага кабінету і Офісу Святланы Ціханоўскай.
«Нашая праца ўжо два гады ажыццяўляецца пад пастаяннымі атакамі з боку рэжыму. Я дзякую Таццяне за тое, што яна вырашыла дапамагчы беларусам сваёй экспертызай і вопытам. Я лічу вялікай стратай сыход Таццяны. Аднак я хачу, каб тыя, хто аказваў на яе ціск, ведалі: мы працягнем нашую працу, нягледзячы ні на што. Мы і не чакалі, што будзе лёгка. Але беларусам, якія штодзень жывуць пад пагрозай рэпрэсій – яшчэ цяжэй», – адзначыла лідарка беларускага дэмакратычнага руху.
Таццяна Зарэцкая была прызначаная на пасаду «міністаркі» эканомікі і фінансаў толькі 9 верасня – менш як два месяцы таму. Дый самы Кабінет, утвораны 9 жніўня, таксама яшчэ не прапрацаваў нават 100 дзён, пасля якіх традыцыйна праводзяць першыя вынікі дзейнасці палітыкаў.
Тым не менш, аналітык Беларускага інстытуту стратэгічных даследаванняў (BISS) Вадзім Мажэйка не бачыць у адстаўцы Таццяны Зарэцкай «трагедыі».
«Сам па сабе факт, што ў Кабінет прыходзяць новыя асобы або нехта сыходзіць, – гэта нармальна. Любая жывая структура мусіць неяк змяняцца. Ненармальна – гэта калі адзін чалавек сядзіць 30 гадоў», – заявіў ён у каментары «Белсату».
Аднак і пазітыву ў адстаўцы няма, «бо пытанне фінансавай устойлівасці сапраўды вельмі важнае. Каб банальна структуры мелі магчымасць функцыянаваць, рабіць сваю штодзённую справу, каб не было праблемаў з офісам ці камандзіроўкамі».
«Таму сумна, калі сыход Таццяны будзе дэманстраваць, што з гэтым не будзе асаблівага прагрэсу», – падкрэсліў аналітык.
Што датычыць канспіралогіі і плётак вакол адстаўкі, то Вадзім Мажэйка раіць не шукаць канспіралогіі там, «дзе ёсць зразумелае тлумачэнне, што чалавек з бізнес-сектару сутыкнуўся з нармальнымі рэчамі для беларускай палітыкі: выліваннем бруду і пагрозамі».
Тым не менш, сыход Таццяны Зарэцкай не будзе на карысць Кабінету, бо «калі палітычныя структуры ўмацоўваюцца новымі тварамі з новым досведам па-за традыцыйнымі палітычнымі структурамі, калі ёсць абнаўленне», «заўсёды выглядае лепей, чым калі сыходзяць, нейкіх асаблівых поспехаў не дасягнуўшы».
Цяпер, адзначыў аналітык, перад Святланай Ціханоўскай і ўсім Кабінетам стаіць новы выклік: «шукаць новыя твары – тых, хто зможа пацягнуць працу». А з гэтым могуць узнікнуць праблемы.
«Гэта не тое месца, дзе можна зарабіць вялікія грошы, нягледзячы на ўсялякія ўкіды прапаганды. Але наадварот, прыходзячы працаваць у такую структуру, ты атрымоўваеш кіпу не надта прыемнай увагі да сябе. Уся дзяржаўная прапаганда, як бачылі ў выпадку таго ж Сахашчыка, будзе корпацца ва ўсіх тваіх сацыяльных сетках на дзесяцігоддзі глыбей, выцягваць любы бруд і на цябе яго выліваць. Усе будуць цябе крытыкаваць за тое, што ты мала зрабіў для вызвалення палітвязняў безадносна таго, наколькі гэта рэальна было магчыма і наколькі гэта было звязана з тваёй пасадай. І, вядома, што будуць пагрозы. Таму, мне здаецца, гэта праца няўдзячная і на яе не так проста знайсці адказнага чалавека з добрым досведам і кампетэнтнага», – мяркуе аналітык.
Што датычыць самога Кабінету, то ў яго «пакуль нейкіх добрых вынікаў і суперпоспехаў няма». Але, дадаў Вадзім Мажэйка, дзівам было б, калі б гэтыя поспехі былі. Разам з тым плюсам з’яўляецца ўжо тое, што «Кабінету атрымоўвалася неяк разам працаваць».
«А гэта вельмі няпроста выбудоўваць працоўную камунікацыю для людзей з вельмі адрозным досведам: хтосьці міністр культуры, хтосьці сілавік, хтосьці журналіст, а хтосьці быў бізнесоўцам. Прынамсі не было дагэтуль ніякіх публічных скандалаў унутры Кабінету – гэта ўжо няблага», – заявіў Вадзім Мажэйка.
Таксама Кабінет ужо зрабіў важныя каштоўнасныя заявы і рэзалюцыі (адносна камуністычнай ідэалогіі, Украіны).
«Але пакуль бачылі працы кожнага асобна па сваім кірунку, а хацелася б пабачыць болей вынікаў супольнай працы, бо ўвесь сэнс аб’яднання ў Кабінет не ў тым, каб Кавалеўскі займаўся вонкавапалітычнымі справамі, а BYPOL – сілавымі (яны гэта і так рабілі)», – падкрэсліў аналітык BISS.
На ягоную думку, у Кабінету пакуль бракуе вынікаў сапраўды супольнай працы. А гэта тое, што ад яго чакаюць, заключыў Вадзім Мажэйка.
Макар Мыш belsat.eu