На панядзелак, 3 красавіка, беларускія сіноптыкі прагназуюць жоўты ўзровень небяспекі, паведамляе «Белгідрамет». На дарогах захаваецца галалёдзіца.
«Па заходняй палове рэспублікі месцамі чакаецца ўзмацненне ветру парывамі да 15-18 м/с, ноччу і раніцай на асобных участках дарог – галалёдзіца», – удакладняюць сіноптыкі.
У Менску, Віцебску, Магілёве і Гомлі будзе воблачна, у Горадні і Берасці – воблачна з праясненнямі. Па ўсёй тэрыторыі краіны, акрамя Гарадзенскай вобласці, чакаюцца невялікія ападкі ў выглядзе снегу, мокрага снегу.
Тэмпература паветра ў Менску – 0..+2°C, цяплей за ўсё ў Гомельскай вобласці – +5..+7°C. У астатніх вобласцях – +1..+4°C.
Таксама сіноптыкі папярэджваюць, што ў бліжэйшыя дні на рацэ Бярэзіне ў Бабруйску ўзровень вады дасягне небяспечнай высокай адзнакі, пры якой раней адзначаліся затапленні прыбярэжных тэрыторый. Вада яшчэ будзе паднімацца ў раёне рэк Дняпра, Заходняй Дзвіны, Сожа, Віхры і Віліі.
Алена Рувіна belsat.eu