Кіеўская вобласць цалкам вызваленая ад расейскіх войскаў. Як цяпер выглядаюць вызваленыя месцы
Вечарам 2 красавіка стала вядома, што Кіеўская вобласць цалкам вызваленая ад расейскіх войскаў. Пры гэта паведаміла намесніца міністра абароны Украіны Ганна Маляр.
«Ірпень, Буча, Гостомель і ўся Кіеўская вобласць – вызвалілі ад захопнікаў», – напісала Ганна Маляр у Twitter.
Таксама яна паведаміла, што зараз варта ўстрымацца ад заезду ў вызваленыя населеныя пункты, пакуль не завершыцца размініраванне.
Мэр Ірпіня Аляксандр Маркушын таксама заявіў, што ўсе навакольныя гарады і вёскі вызвалены ад варожых войскаў.
Зараз у горадзе разбіраюць завалы і арганізуюць дастаўку ежы і лекаў пакінутым жыхарам. У той жа час, тым, хто выехаў з горада, зараз вяртацца небяспечна да заканчэння работ па размініраванні тэрыторыі.
Так, у вызваленым ад расяян Ірпіні ўкраінскія ратавальнікі за дзень канфіскавалі каля 650 выбухованебяспечных прадметаў.
А так пасля сыходу расейскіх вайскоўцаў выглядае сам Ірпінь:
Спецназаўцы Нацпаліцыі прыступілі да зачысткі горада Буча.
«Каля 300 грамадзянскіх пахаваны ў «брацкай» магіле ў Бучы», – паведаміла AFP са спасылкай на мэра горада.
А так зараз выглядае самалёт Ан-225 «Мрія». Ён быў знішчаны ў лютым 2022 у аэрапорце Гостомель пад Кіевам у выніку паветранага нападу расейскіх войскаў. «Мрія» з’яўляецца самым вялікім і грузападʼёмным самалётам за ўсю гісторыю сусветнай авіяцыі.
Украінскі вайсковец распавёў, што расейскія вайскоўцы, якія прастаялі ў Гостомелі каля месяца, паспелі абкрасці навакольныя дамы, але так і не змаглі пахаваць сваіх забітых.
Міністэрства абароны Украіны паведамляе, што каля трасы ў 20 км ад Кіева знойдзены мёртвыя мірныя жыхары. «Пад коўдрай 4-5 мёртвых аголеных жанчын, якіх расейскія варвары спрабавалі спаліць там жа на ўзбочыне», – напісана ў паведамленні.
Таксама паведамляецца, што на вызваленых тэрыторыях знаходзяцца целы закатаваных і расстраляных жыхароў са звязанымі за спіной рукамі.
АД belsat.eu
