У Крамлі адрэагавалі на пастанову ўладаў Беларусі заблакаваць доступ да сайту выдання «Комсомольская правда в Белоруссии». Дзмітрый Пяскоў, прэсавы сакратар Уладзіміра Пуціна, раскрытыкаваў афіцыйны Менск, паведамляе ТАСС.
Прэс-сакратар прэзідэнта РФ Дзмітрый Пяскоў лічыць, што абмежаванне доступу да інфармацыі сайту «КП в Белоруссии» пярэчыць прынцыпу свабоды СМІ.
«Мы катэгарычна не згодныя з гэтым. Мы лічым, што, безумоўна, гэта ідзе ў парушэнне прынцыпу свабоды СМІ», – сказаў прадстаўнік Крамля.
Сайт «КП в Белоруссии» ўлады заблакавалі 29 верасня. Паводле Міністэрства інфармацыі, прычыны такой захады – у парушэнні заканадаўства.
Рэдакцыя выдання адказала на гэта, што не атрымала папярэджання. Акрамя таго, журналісты працуюць у межах «збалансаванай інфармацыйнай палітыкі і не ставяць сваёй працаю мэты ствараць напружанне ў грамадстве».
СК belsat.eu
