Яшчэ адна краіна Скандынавіі прымае рашэнне перагледзець свой абарончы статус. Данія даўно з’яўляецца часткай NATO, але збіраецца далучыцца да адзінай сістэмы абароны ЕЗ, паведамляе ВВС. Нягледзячы на сяброўства ў Еўразвязе, 30 гадоў Данія адмаўлялася прымаць удзел у супольных абарончых праграмах ЕЗ.
Датчане прагаласуюць на рэферэндуме пасля 30-гадовай адмовы ад удзелу ў абарончых праграмах бяспекі ЕЗ. Дагэтуль Данія з’яўлялася адзіным сябрам ЕЗ, які мае абарончую рэзервацыю. Але, як і яе паўночныя суседзі, Швецыя і Фінляндыя, яна вымушана перагледзець палітыку бяспекі з моманту пачатку вайны Расеі супраць Украіны.
Урад Даніі сцвярджае, што сітуацыя ў рэгіянальнай бяспецы змянілася, і гэта заклікае Данію больш шчыльна супрацоўнічаць з Еўразвязам па пытаннях абароны і бяспекі, нягледзячы на тое, што краіна зʼяўляецца сябрам NATO.
Калі Данія прагаласуе «За», гэта будзе адзначаць яшчэ больш шчыльную супрацу краін ЕЗ у галіне бяспекі і працягне зрухі ў палітыцы краін Скандынавіі, якія дагэтуль прытрымліваліся нейтральнага статуса.
Нагадаем, што ў сакавіку парламент Даніі прыняў рашэнне аб вялізным павелічэнні выдаткаў на абарону, калі на наступныя два гады было адкладзена дадаткова 1 мільярд долараў. Да 2033 года лічба павялічыцца да 2% ВУП у адпаведнасці з патрабаваннямі сяброўства ў NATO. Тады ж было абвешчана пра рэферэндум і планы адмовы ад расейскага газу.
Рэферэндум у Даніі зʼяўляецца часткай шырокага перагляду палітыкі бяспекі ў Скандынаўскім рэгіёне.
Раман Лугоўскі belsat.eu
