У 2023 годзе ў Беларусі былі звольненыя амаль 693 тысячы чалавек. Тым часам на працу ўзялі 630,15 тысяч чалавек. Звальненняў было больш, чым працаўладкаванняў на 62,8 тысяч, вынікае са справаздачы Белстату, піша Reform.by.
У сельскагаспадарчай галіне, лясной і рыбнай гаспадарках летась былі звольненыя на 9,88 тысяч чалавек больш за прынятых на працу. У апрацоўчай прамысловасці звальненняў было на 6,05 тысяч чалавек больш, чым працаўладкаванняў. Такая ж сітуацыя ў будаўніцтве – звольнілі на 6,5 тысяч чалавек больш, чым узялі.
У аптовым і раздробным гандлі, рамонце аўтамабіляў і матацыклаў звальненняў было больш на 10,42 тысяч. У транспарце і лагістыцы звольнілі на 6,2 тысячы чалавек больш, чым прынялі на працу.
У галіне інфармацыі і сувязі звольнілі больш за 18 тысяч чалавек, што на 6,93 тысячы больш, чым працаўладкаванняў – колькасць прыёмаў на працу скарацілася на 29,3%.
У фінансавай і страхавой галінах звольнілі на 1,89 тысяч чалавек больш, чым прынялі на працу.
На 7,9 тысяч больш звальненняў, чым уладкаванняў было ў галіне адукацыі.
Нават у дзяржаўным кіраванні звальненняў у 2023 годзе было больш, чым прыёмаў на працу – на 675 чалавек.
У ахове здароўя колькасць звальненняў перавысіла колькасць працаўладкаванняў на 920 чалавек.
Больш прыёмаў на працу, чым звальненняў, было ў прафесійнай, навуковай і тэхнічнай дзейнасці – узялі на 802 чалавекі больш, чым звольнілі.
У 2023 годзе колькасць занятых у беларускай эканоміцы скарацілася на 49,5 тысяч чалавек. Па стане на снежань у эканоміцы былі занятыя 4,14 мільёнаў чалавек.
У параўнанні з 2022 годам, летась колькасць працаўладкаванняў зменшылася на 1,2%, звальненняў – на 2,3%.
У справаздачу не ўключаныя мікра- і малыя прадпрыемствы без ведамаснай падпарадкаванасці.
Марыя Міхалевіч belsat.eu