Курс долара набліжаецца да трох рублёў, крэдытны рэйтынг Беларусі стаў самым нізкім, а ў свеце разгортваецца гандлёвая вайна, ініцыяваная ЗША на чале з Доналдам Трампам. Што ў такім разе рабіць простаму беларусу са сваімі ашчаджэннямі? Парады ад Вольгі Лойкі, якія яна дае ў «Раніцы з Белсатам».
Вольга Лойка раіць не абіраць рызыкоўных стратэгіяў. Напрыклад, калі вы прачыталі навіну пра тое, як расейцы хлынулі ў беларускія гарады і здымаюць кватэры для адпачынку, і цяпер хочаце на гэтым зарабіць, узяўшы крэдыт на жытло, не рызыкуйце: «Гэтая ідэя дрэнная, бо той менеджар "Газпрому", на якога вы разлічваеце і які арандуе кватэры за 500 долараў за ноч, можа неўзабаве страціць працу».
А як жа абмен валюты? Ці варта скупляць патаннелыя долары або ўкладацца ў еўры?
Экспертка раіць не спяшацца ні з тым, ні з другім – акрамя выпадкаў, калі вам патрэбная замежная валюта, напрыклад, для адпачынку за межамі Беларусі:
,,«Падумайце, у якой валюце вы будзеце траціць, і набывайце тую валюту, у якой вы будзеце траціць. Бо сумы невялікія, і на канвертацыі вы страціце больш, чым ашчадзіце».
Пры гэтым, калі вы ўсё ж выбіраеце для ашчаджэнняў паміж доларам і еўрам, Лойка раіць спыніцца на грашовых адзінках Еўразвязу.
Што чакае беларускі рубель у кароткай перспектыве?
,,«Большая імавернасць хай на невялікую, але дэвальвацыю. Бо сітуацыя на беларускім рынку пагаршаецца, і неабходна падтрымаць экспарцёраў у Беларусі. На гэта неабходны слабы рубель, каб прадукцыя беларусаў была больш канкурэнтаздольная ў Расеі. Калі танны расейскі тавар кудысьці хлыне – гэта, з найвялікшай імавернасцю, будзе Расея. І таму беларускі тавар там акажацца ў вельмі цяжкай сітуацыі».
Той жа, хто абірае расейскі рубель, мусіць улічваць, што, паводле Лойкі, той «пераацэнены на 20 %», і цяпер ён ва ўмовах узмацнення ціску. Таму найхутчэй да канца 2025 года яго курс будзе зменшаны: «Не ляснецца, але для беларусаў гэта дастаткова заўважнае змяншэнне».
Як жа простаму беларусу рэагаваць на эканамічныя навіны пра мыта і гандлёвую вайну, якія сёння гучаць з кожнага праса?
,,«А як мы паводзімся на атракцыёне «амерыканскія горкі»? Прышпіліцца як мага мацней і спадзявацца, што ўсё будзе добра, як звычайна. І атрымліваем задавальненне».
Таму ні ў якім разе не панікуйце і не рабіце глупстваў! Але калі вы, напрыклад, збіраліся набыць айфон – варта зрабіць гэта цяпер, бо пазней ён можа каштаваць нашмат даражэй. Экспертка зазначае, што гандлёвая вайна – не так ужо і дрэнна, бо для беларускага спажыўца можа паболець танных кітайскіх тавараў. Аднак для нашых прадпрыемстваў – гэта не надта добра. Таксама Лойка раіць не спрабаваць зарабіць на самастойнай пастаўцы танных тавараў «Made in China», бо «Лукашэнка, як і Трамп», можа вельмі хутка пабачыць пагрозу і ўвесці ўласнае мыта: «Не спрабуйце зараз у гэтай мутнай вадзе нешта злавіць!»
Урэшце Вольга Лойка дае жартаўлівую параду:
,,«Садзіце бульбу! Не памыліцеся!»
Цалкам размову з Вольгай Лойкай глядзіце ў «Раніцы з Белсатам»:
