Былога прэзідэнта Перу Аллянта Умалю і ягоную жонку Надынэ Эрэдыю прызналі вінаватымі ў адмыванні грошай.
Праз гады разбораў суд пастанавіў, што пара атрымала мільёны долараў ад бразільскай будаўнічай кампаніі «Odebrecht» для фінансавання выбарчых кампаніяў Умалі ў 2006 і 2011 гадах, паведамляе Бі-Бі-Сі.
У выніку абое атрымалі па 15 гадоў, што менш за запытаны пракурорамі тэрмін: для Умалі прасілі 20 гадоў турэмнага зняволення, для Эрэдыі – 26,5 года. Абое адмаўлялі якую-кольвек віну.
Абвешчаны прысуд 15 красавіка 62-гадовы Умаля слухаў на судзе асабіста, а 48-гадовая Эрыдын – праз відэасувязі. Эрэдыя атрымала прытулак у Бразіліі і пераехала туды разам са сваім сынам.
Праблемы з законам у Аллянты Умалі пачаліся ў 2016 годзе, пасля заканчэння прэзідэнцкага тэрміну, калі бразільскі будаўнічы гігант «Odebrecht» прызнаўся ў выплаце сотняў мільёнаў долараў хабараў урадавым чыноўнікам і палітычным партыям па ўсёй Лацінскай Амерыцы з мэтай атрымання камерцыйных замоваў.
Карпарацыя «Odebrecht» з 2001 да 2016 года заплаціла ў якасці хабару $ 788 мільёнаў у 12 краінах Лацінскай Амерыкі ўзамен на выгадныя кантракты. У Перу, паводле паказанняў кіраўніцтва «Odebrecht», кампанія заплаціла хабараў на $ 29 мільёнаў.
Самым высокапастаўленым палітыкам, асуджаным за хабар ад кампаніі, стаўся віцэ-прэзідэнт Эквадору Хорхэ Гляс, які ў 2017-м атрымаў 6 гадоў.
У атрыманні грошай ад будаўнічага гіганта западозрылі адразу чатырох былых прэзідэнтаў краіны – Пэдра Кучынскага, Алехандра Таледа, Аллянту Умалю і Аляна Гарсію. Гарсія скончыў самагубствам, калі паліцыя прыйшла ўзяць яго пад арышт у справе «Odebrecht». На пахаванні дачка зачытала ягоную перадсмяротную цыдулку, у якой былы прэзідэнт заявіў пра сваю невінаватасць.
Тэса Анэйда / belsat.eu
