Адміністратыўны арышт за «экстрэмізм» стаў прычынай выключэння прарасейскай актывісткі з універсітэту.
Стала вядома, што прарасейская прапагандыстка Вольга Бондарава, якая нядаўна атрымала 13 содняў адміністратыўнага арышту, больш не студэнтка Беларускага дзяржаўнага педагагічнага ўніверсітэту імя Максіма Танка.
Пра адлічэнне Бондаравай паведаміла працаўніца дэканату. З ейных словаў, адміністрацыя БДПУ палічыла пропускі заняткаў у перыяд арышту няважкай прычынай, таму і пастанавіла выключыць студэнтку з ліку навучэнцаў. Вядома, што Бондарава вучылася на трэцім курсе філалагічнага факультэту, на спецыяльнасці «Беларуская мова і літаратура».
Дарэчы, такая пастанова цалкам адпавядае зменам у Кодэксе адукацыі, што ўвайшлі ў сілу ў 2022 годзе. Згодна з пунктам 5.18.1 артыкулу 68, студэнт можа быць адлічаны ў сувязі з адбыццём адміністратыўнага арышту. Раней, да ўнясення гэтых паправак, універсітэты самастойна трактавалі «содні» як няважкую прычыну адсутнасці і дастасоўвалі дысцыплінарнае спагнанне, што часта заканчвалася адлічэннем.
Калі б адміністрацыя БДПУ не адлічыла Бондараву, яна парушыла б адразу два артыкулы Кодэксу адукацыі. Пры гэтым праваабаронцы звяртаюць увагу, што сам адміністратыўны арышт не перашкаджае Бондаравай у будучыні працаваць у адукацыйнай сферы, бо забараніць працу педагогам могуць толькі ў выпадку, калі асоба асуджаная паводле крымінальнага артыкулу за «экстрэмізм».
У дзейным законе «Аб супрацьдзеянні экстрэмізму» сказана, што забарона на педагагічную дзейнасць дзее толькі падчас судзімасці і цягам пяці гадоў пасля яе пагашэння. Паколькі Бондараву прыцягнулі да адміністратыўнай, а не крымінальнай адказнасці, яна мае права на працу ў школе – калі, вядома, супраць яе не завядуць яшчэ і крымінальнай справы.
Аднак сітуацыя можа змяніцца. У снежні 2024 года Палата прадстаўнікоў атрымала на разгляд праект паправак да Закону «Аб правах дзіцяці», што пашырае пералік падставаў для забароны педагагічнай працы, у тым ліку і за «экстрэмісцкія дзеянні».
Надзея Вольная / belsat.eu
