Сілавікі дапамагаюць падаткавікам папаўняць бюджэт. На загад кіраўніка МУС дзяржаўныя службоўцы актуалізуюць базу дадзеных працаздольных асобаў, не занятых у эканоміцы. У Менску паводле спісаў правядуць рэйды і, цытата, «удасканаляць заканадаўства». Асаблівая ўвага да асобаў, якія працуюць за мяжою. Пра ўзмацненне ўведзенага 10 гадоў таму «Дэкрэту № 3».
Дэфіцыт бюджэту памерам Br 4,5 млрд змяншаць узяліся за кошт людзей. Выганяць на працу – беспрацоўных. Спаганяць больш штрафаў з асобаў, якія не плоцяць падаткаў на радзіме.
- Ва ўсіх раёнах Менску пройдуць пазапланавыя адпрацоўванні. Паводле вынікаў рэйдаў будуць унесеныя прапановы для ўдасканалення заканадаўства. У Менску гэтая катэгорыя будзе адпрацаваная на 100 %. Працаваць мусяць усе, хто карыстаецца сацыяльнымі выгодамі, што дае дзяржава, - кажа Іван Кубракоў, кіраўнік МУС.
Не ўсе карыстаюцца тымі выгодамі – скандавалі людзі восем гадоў таму пад час пратэстаў супраць Дэкрэту «Аб папярэджанні сацыяльнага ўтрыманства». Дзяржава тады павысіла да 200 базавых велічынь штрафы для неплацельнікаў збору за так званае дармаедства. Абавязвалі ж перадусім грамадзян, якія працуюць менш чым 183 дні ў годзе і не маюць іншых даходаў. Праз год пачаліся рэйды пошуку такіх асоб. Колькасць штрафаў вырасла. Блогер Аляксандр Кабанаў удзельнічаў у пратэстах у Берасці. Цяпер атрымаў з Беларусі інфармацыю:
«Цяпер ідзе масавая рассылка лістоў – непасрэдна з райвыканкамаў – непасрэдна людзям. Яны правяраюць спісы – хто дзе працуе, а хто не. Калі не знаходзяць доказаў, што людзі працаўладкаваныя, то прыходзяць лісты ў паштовыя скрыні».
Рэжым паабяцаў разабрацца таксама з беларусамі, што працуюць за мяжой. Здавалася б, для іх ужо павысілі тарыфы на камунальныя паслугі. Што далей?
- Калі людзі пачнуць плаціць і яны пабачаць, што паступленні ідуць, то можна будзе паступова планку задзіраць. А другі крок, які можа быць – гэта... тыя людзі, якія выязджаюць працаваць за мяжу, а потым усё ж вяртаюцца, для іх могуць зрабіць платнымі медычныя паслугі могуць залезці ў кішэню праз падатковую – спытаць – што вы там зарабілі? – разважае Аляксандр Кабанаў.
Ва ўмовах эканамічнага крызісу дзяржава мае не караць, а вітаць людзей, якія зарабляюць грошы за мяжой і выдаткоўваюць у Беларусі, падтрымліваючы эканоміку – заўважыў палітолаг Павел Усаў:
«Эканамічны ціск ва ўмовах глыбокага і сістэмнага палітычнага крызісу – вельмі небяспечны. Тое, што зрабіў Лукашэнка ў 2015-2017 годзе – стала адным з фактараў не толькі бунту «дармаедаў», але таксама рэвалюцыі 2020-га году. Відавочна, што і адміністрацыя дыктатара, і ён сам, вельмі хутка забыліся пра тое, што здарылася ў 2020-ым годзе».
Не забываюцца аднак дыскрымінаваць былых палітвязняў. Цяпер іх не прымаюць на працу, і не выпускаюць з межы Беларусі.
- Яны лічаць, што так і трэба. Не толькі не ўладкоўваць іх на працу, але і яшчэ дадаткова выцягваць з іх грошы. Даведацца, якім коштам яны жывуць. Канечне гэта дадатковы ціск. Але, у параўнанні з колькасцю насельніцтва Менску, колькасць палітвязняў – гэта кропля ў моры. А ўдар будзе па ўсяму насельніцтву. Менск не вельмі «прымае» і не падтрымлівае Лукашэнка, – кажа Павел Усаў.
Пацярпяць таксама залежныя ад алкаголю і наркотыкаў. Міністэрства ўнутраных справаў паставіла іх перад выбарам – ці працаўладкаванне ці Лячэбна-працоўны прафілакторый: да 2 гадоў за кратамі і прымусовая праца за Br 30 на месяц.
Юлія Цяльпук belsat.eu
