Чыноўнікі падзяліліся планамі – у так званую пяцігодку якасці плануецца адрамантаваць 250 кіламетраў рэспубліканскіх дарог. Аднак пытанне не ў колькасці кіламетраў, а ўласна ў якасці дарог. Штогод беларусы сутыкаюцца з праблемаю, якая зрабілася ўжо амаль нацыянальнаю: ямкавы рамонт. Гэты працэс не толькі не развязвае праблемы, але часам выглядае абсурдна і нават небяспечна. Разбіраемся чаму.
Рамонт у любое надвор'е. Відэа, на якіх рабочыя кідаюць асфальт у ваду, – не рэдкасць у сацыяльных сетках нават дзяржаўных медыяў. Вось такая пяцігодка якасці.
«Вы не ўбачыце нідзе ў Еўропе, каб клалі той жа асфальт у мароз, у снег, у дождж. Паверхня павінна быць абавязкова падрыхтаваная, вытрымліваць пэўныя тэмпературныя ўмовы і гэтак далей. Скажам, усё вось гэтае антытэхналагічнае ўкладванне асфальту потым вылазіць у тое, што з'яўляюцца новыя ямы, асфальт недаўгавечны», – тлумачыць «Белсату» асаблівасці беларускага рамонту дарог прадстаўнік Рабочага руху Аляксандр Сакалоў.
Чаму ж у Беларусі не зважаюць ні на дождж, ні на снег? І чаму замест аднаўлення ўсяго палатна робіцца рамонт ямкавы, цікавімся ў эксперта.
,,«Нібыта, на ямкавы рамонт трэба менш выдаткаў, чым на ўкладванне вялікіх плошчаў асфальтавага пакрыцця. Але пры гэтым на гэты ямкавы рамонт можна спісаць колькі заўгодна сродкаў. Гэта значыць, у тэорыі гэта нібыта патанняе рамонт, а на практыцы наадварот прыводзіць да раскрадання бюджэтных сродкаў», – тлумачыць Аляксандр Сакалоў.
З другога боку, мясцовым бюджэтам не стае сродкаў на паўнавартасны рамонт. Яшчэ дзесяць гадоў таму беларускія дарогі былі значна больш якасныя. Немалыя грошы Беларусі на гэтыя патрэбы даваў Еўразвяз. Гэтак, у 2019-м паводле Еўрапейскага плану мадэрнізацыі дарог у краінах «Усходняга партнёрства» Менск меўся атрымаць больш за мільярд еўраў.
,,«Еўрапейскія грошы ішлі на будаўніцтва і рамонты гэтых дарог. Цяпер Лукашэнка ўладу захоплівае, Еўропа грошай яму не дае, пачынаюцца праблемы. І яны спрабуюць зрабіць хоць нешта, каб паказаць выгляд, што нешта робіцца. Апроч браку фінансаў, на стан дарог уплывае і беспасярэдне спецыфіка лукашэнкаўскай Беларусі», – адзначае блогер, аўтар каналу «Реальная Беларусь» Арцём Шапараў.
Ён нагадвае, што большасць ключавых кіроўных пасадаў у Беларусі займаюць сілавікі, якія ніякага дачынення да дарожнага будаўніцтва не маюць.
«Калі раптам выйдзе, што ў якім-небудзь трэсце знойдзецца дырэктар, які сапраўды прайшоў па кар'ернай лесвіцы, то вышэйшы начальнік абавязкова будзе мент, які ў гэтым нічога не разумее. І ягоныя інтарэсы і прыярытэты іншыя», – тлумачыць Арцём Шапараў.
Паводле планаў на наступную пяцігодку, чыноўнікі збіраюцца адрамантаваць 250 кіламетраў рэспубліканскіх дарог. Развіццё асноўных магістраляў, будаўніцтва новых транспартавых развязак. Што ж датычыць гарадскіх і рэгіянальных дарог, яны, найхутчэй, дачакаюцца толькі ямкавага рамонту пры любым надворʼі.
Руслан Ігнатовіч belsat.eu
