Відэааператар з Гомля Андрэй Толчын пасля суда ў снежні цяпер на волі, але ён выйшаў не з ізалятару часовага ўтрымання, а з лякарні, паведамляе «Гомельская Вясна».
Андрэй Толчын быў пакараны ў сакавіку 2024 года 2,5 гадамі зняволення нібыта за «садзейнічанне экстрэмісцкай дзейнасці» (арт. 361.4 ч. 1 КК) і «знявагу Лукашэнкі» (арт. 367 ч. 2 КК). У верасні ён выйшаў на волю па памілаванні. Праз паўтара месяца журналіста зноў затрымалі.
5 снежня 2024 года яго судзілі нібыта за «распаўсюд экстрэмісцкіх матэрыялаў» (ч. 2 арт. 19.11 КаАП).
Далейшы лёс журналіста быў не вядомы да 3 лютага, калі праваабаронцы атрымалі інфармацыю пра тое, што Андрэй Толчын ужо на волі.
«Але на волю ён выходзіў не з ІЧУ, а з лякарні. Што з ім здарылася ў ІЧУ, што яго давялося шпіталізаваць, пакуль не вядома. Як і невядомы цяперашні стан здароўя Толчына.
Крыніца праваабаронцаў у Гомлі паведаміла, што Андрэя Толчына прымусілі штодня хадзіць у РАУС і адзначацца», – піша «Гомельская Вясна».
Арсен Рудэнка belsat.eu
