Беларускія ўлады збіраюцца ўзяць ільготны крэдыт у Кітаі. Адпаведная пастанова апублікаваная на прававым інтэрнэт-партале «Pravo.by».
Савет Міністраў Беларусі 23 студзеня ўхваліў адпаведны праект рамачнага пагаднення паміж урадам Рэспублікі Беларусь і ўрадам Кітайскай Народнай Рэспублікі аб наданні ільготнага крэдыту нашай краіне.
Адказваць за правядзенне перамоваў і падпісанне пагаднення будзе Міністэрства фінансаў. У той жа час мэта, сума і іншыя звесткі пра крэдыт у дакуменце не ўдакладняюцца.
Як адзначыла ў сваім каментары для «Белсату» кіраўніца ўсходнеазіяцкага прадстаўніцтва Ліберальна-дэмакратычнай лігі Украіны Марыя Макаровіч, у Кітаі існуе практыка даваць крэдыты на заведама стратныя праекты – такія, за якія краіны ніколі не здолеюць разлічыцца і будуць вымушаныя выплачваць не толькі сам крэдыт, але і штрафы і пені.
,,«Кітай большы крэдытор, чым МВФ. Амаль кожны трэці праект, што яны крэдытуюць, заведама стратны. Такім чынам яны ўзмацняюць свой уплыў і могуць ціснуць на краіны датычна змякчэння ўмовы аплаты ці наадварот», – заўважыла Марыя Макаровіч.
Суразмоўніца «Белсату» адзначыла, што не мае звестак пра тое, які крэдыт збіраецца браць Беларусь у Кітая, але заўважыла, што агулам крэдыт з Кітая – гэта «дрэнная, небяспечная для эканомікі і бяспекі ідэя».
Марыя Макаровіч падкрэсліла, што любыя пагадненні з кітайскімі крэдыторамі і інвестарамі ўтрымліваюць пункты пра неразгалошванне і канфідэнцыяльнасць інфармацыі.
,,«То бок сачыць за такімі праектамі і рухам грошай у іх складана праз адсутнасць інфармацыі, бо яна не публікуецца. Гэта дадаткова правакуе з'яўленне большай колькасці карупцыйных кейсаў з боку краіны, што атрымлівае крэдыт. Бо грамадства не здольнае эфектыўна кантраляваць гэтыя грошы і выдаткі», – заўважыла кіраўніца ўсходнеазіяцкага прадстаўніцтва Ліберальна-дэмакратычнай лігі Украіны.
Нагадаем, што ў 2016 годзе Беларусь атрымала паўтара мільярда долараў ад Дзяржаўнага банку развіцця Кітаю на будаўніцтва горнаўзбагачальнага камбінату «Слаўкалій». У снежні 2019 года паведамлялася таксама, што Кітай вылучыць Беларусі тэрміновы крэдыт на суму 3,5 мільярда юаняў (больш за 500 мільёнаў долараў), тады яго назвалі «беспрэцэдэнтным».
Раман Шавель belsat.eu
