Еўразійская эканамічная камісія збіраецца паступова знізіць бязмытныя ліміты на закупы ў замежных інтэрнэт-крамах. Да 2027 года максімальную суму могуць зменшыць да 50 еўраў. Разам з тым беларускі рынак электроннага гандлю працягвае развівацца: пра запуск уласнага маркетплэйсу заяўляе «Белпошта». Але ці вытрымае канкурэнцыю новая пляцоўка і ці не ўмацуюцца на нашым рынку буйныя гульцы, звязаныя з расейскім капіталам?
Еўразійская эканамічная камісія апублікавала праект дакументу. А ў ім – план зніжэння бязмытнага парогу для тавараў электроннага гандлю ў краінах Еўразійскага эканамічнага саюзу. Новы праект прапануе паступова скарачаць ліміты бязмытнага завозу. Гаворка пра ўсе куплі, што здзяйсняюцца ў міжнародных інтэрнэт-крамах.
Згодна з праектам, ліміт на бязмытны завоз тавараў будзе зніжацца ў некалькі этапаў:
У 2025-м – да 200 еўраў.
У 2026-м – да 100 еўраў.
У 2027-м – да 50 еўраў.
Цяпер бязмытна можна ўвозіць тавары коштам да 500 еўраў. Паводле прэзідэнта Міжнароднага інстытуту Свабоды Яраслава Раманчука, гэта прывядзе да таго, што цэны ў інтэрнэт-крамах будуць павялічвацца.
,,«Гэта спроба манапалізацыі рынку, таму што, калі шмат гэтых крамаў, тады можна і канкурэнцыю зрабіць. А гэта не падабаецца таталітарным сістэмам, якія арыентаваныя на дзяржплан. Таму, ведаеце, замест усіх гэтых маркетплэйсаў будуць там 2-3 вызначаныя структуры, якім будзе можна больш, чым іншым».
Пры гэтым апошнія шэсць гадоў рынак інтэрнэт-гандлю ў Беларусі павялічыўся амаль у два разы. Паводле Міністэрства антыманапольнага рэгулявання і гандлю, у 2023 годзе аб'ём продажаў праз інтэрнэт-крамы перавысіў 5 мільярдаў рублёў. Блогер, вядоўца праграмы «Атмасфера» на «Белсаце» Аляксандр Кныровіч лічыць, што гэта цалкам натуральнае развіцце падзеяў:
«Да нас прыйшоў вось гэты гандаль у онлайн-фармаце пазней за развітыя краіны на некалькі гадоў. Ну, мы разумеем, што ў Беларусі не вельмі спрыяльныя інвестыцыйныя магчымасці. Мы невялікі рынак. І мы ведаем, які ціск цяпер дзяржава аказвае на нашых прадпрыемствах. У тым ліку на тых, якія працавалі ў гэтым фармаце».
Адзін з ключавых трэндаў электроннай камерцыі ў Беларусі – гэта развіццё буйных маркетплэйсаў з расейскім капіталам, такіх як «Wildberries» і «Ozon». Аляксандр Кныровіч падкрэслівае, што яны прынеслі з сабой новы фармат і магчымасці купіць тыя рэчы, якія жадаюць купіць беларусы, але за цэны, значна ніжэйшыя, чым у звычайных крамах, адзінае…
«Тут ёсць пагроза краіне, калі вельмі буйны рынак, а ён будзе развівацца і далей, захопяць толькі дзве кампаніі з адной краіны, з якой у нас не толькі эканамічныя, але і вельмі такія цяжкія палітычныя стасункі».
На гэтым фоне пра планы запусціць уласны маркетплэйс заяўляе «Белпошта». Паводле кіраўнікоў дзяржаўнага прадпрыемства, новая платформа мае стаць аналагам буйных міжнародных гульцоў, даючы беларускім карыстальнікам зручныя і даступныя магчымасці для набыцця тавараў праз інтэрнэт.
,,«Я бачу, што ўлады пакуль што, напэўна, зацікаўленыя ў тым, каб проста крыху фінансава пасунуць там "Alegro", "Wildberries", расейскія маркетплэйсы. І частку проста грошай у іх забраць», – разважае беларускі прадпрымальнік Зміцер Завадскі.
Пакуль жа ў планах «Белпошты» прапанаваць як айчынныя, так і міжнародныя тавары, стымулюючы развіццё беларускага інтэрнэт-гандлю.
Падрабязней глядзіце ў сюжэце:
Руслан Ігнатовіч, Марыя Голдстэйн, «Белсат»
