Надоечы стала вядома, што былому польскаму суддзі Томашу Шмыту, які ўцёк у Беларусь, анулявалі пашпарт. «Белсат» запытаўся ў польскай пракуратуры, ці насамрэч пашпарт быў прызнаны несапраўдным, калі так, то чаму было прынятае такое рашэнне, ці азначае гэта таксама пазбаўленне беглага суддзі польскага грамадзянства і ці зможа ён вярнуцца ў Польшчу. Апавядаем, што нам адказалі.
Прэс-служба польскай пракуратуры пацвердзіла, што пракурор насамрэч падаў заяву мазавецкаму ваяводу «аб прызнанні пашпарта падазраванага Томаша Шмыта несапраўдным». Мазавецкі ваявода ў адказ пастанавіў ануляваць пашпарт былога суддзі.
,,«Гэтыя дзеянні мелі на мэце абмежаванне магчымасцяў падазраванага, які ў вышуку, для перасоўвання. Гэтае рашэнне не азначае аўтаматычнага пазбаўлення падазраванага польскага грамадзянства. У выпадку мінання мяжы Польшчы падазраваны Т. Шмыт быў бы затрыманы, бо ён у вышуку, і ў ягоным дачыненні суд выдаў пастанову аб часовым арышце», ‒ гаворыцца ў адказе пракуратуры, падпісаным прэс-сакратаркаю Катажынаю Цалеў-Яшэўскай.
Пра прызнанне пашпарту былога суддзі Шмыта несапраўдным раней паведаміла «Gazeta Wyborcza».
«Згодна з законам, ваявода можа прызнаць несапраўдным пашпарт любога грамадзяніна на патрабаванне суда, што вядзе крымінальную справу, або пракурора, які вядзе расследаванне. Патрабаванне не патрабуе абгрунтавання», – пісала выданне.
Прапагандысцкія тэлеграм-каналы, набліжаныя да ўладаў рэжыму Лукашэнкі, паспяшаліся напісаць, што ў Польшчы «без нейкіх прававых падставаў анулявалі пашпарт суддзі Шмыта», «толькі за тое, што ён наведаў Беларусь і выказаў сваё меркаванне».
«Наш закон аб пазбаўленні грамадзянства скіраваны выключна супраць экстрэмістаў і тэрарыстаў, а ў Польшчы пазбаўляюць грамадзянства проста за нязгоду з афіцыйнаю пазіцыяй», ‒ заяўлялі прапагандысты.
Сам Шмыт выказаўся, што ануляванне пашпарту – вынік ягонай працы.
6 траўня 2024 года сталася вядома, што польскі суддзя Шмыт перабывае ў Менску і просіць палітычнага прытулку ў Беларусі. У Польшчы ён быў замяшаны ў скандале з ціскам на суддзяў, якія выступалі супраць судовай рэформы. Гэтым уцекачом актыўна карыстаюцца лукашэнкаўскія прапагандысты ды, імаверна, спецслужбы.
Шмыт заяўляў, што ўцёк праз нязгоду з палітыкаю польскіх уладаў і пагрозу фабрыкавання супраць яго справы за шпіянаж. Польскія ўлады, паводле яго, пад уплывам Злучаных Штатаў і Вялікай Брытаніі вядуць у дачыненні Беларусі і Расеі «несправядлівую і абразлівую» палітыку ды нібыта могуць такім чынам уцягнуць Польшчу ў вайну ва Украіне.
7 траўня прэм’ер-міністр Польшчы Дональд Туск заявіў, што Шмыт меў доступ да сакрэтных дакументаў і да Міністэрства юстыцыі, а значыць, і для беларускіх спецслужбаў яны былі дасяжныя. У Польшчы былы суддзя абвешчаны ў вышук, на ягоны арышт выдадзены еўрапейскі ордар.
У канцы верасня Шмыт апублікаваў у сацсетцы Х допіс пра тое, што «гэтыя ідыёты з Беларусі ніколі гэтага не зразумеюць», і нават развітаўся з чытачамі. Ён напісаў, што яго «могуць забіць», што яму «пляваць на дамоўленасці» і што ён усё яшчэ можа «разбурыць гэтую дзяржаву» ды «цяпер ім проста хана».
Марыя Міхалевіч belsat.eu
