Запыт у Міжнародную арганізацыю крымінальнай паліцыі адносна абвінавачаных у захопе самалёту «RyanAir» беларусаў рыхтуецца і будзе накіраваны, калі адпаведныя дакументы будуць перакладзеныя на англійскую мову, паведамілі «Белсату» ў Нацыянальнай пракуратуры краіны.
Абвінавачаных будуць шукаць паводле гэтак званай чырвонай карткі, запэўніў «Белсат» прэс-сакратар Нацыянальнай пракуратуры Польшчы Пшэмыслаў Новак.
«Запыт у Інтэрпол адбудзецца, калі неабходныя дакументы будуць перакладзеныя на англійскую мову. Ордар на арышт будзе апублікаваны адразу ж пасля таго, як будзе гатовы, а таксама разам з чырвоным паведамленнем на сайце Інтэрполу», - сказаў ён.
Тады ж стане вядомым прозвішча афіцэра КДБ, які датычны да злачынства, адзначыў ён.
Калі гэта здарыцца, пакуль не вядома:
«Пэўных дадзеных няма. Тэрмін у працэдуры не пазначаны. Гэта залежыць ад аб'ёму матэрыялаў, што належыць перакласці».
Сама справа фактычна будзе «замарожаная» да моманту арышту фігурантаў, бо завочных судоў у Польшчы няма:
«Падазраваных будзе шукаць Інтэрпол. Маецца пастанова суда аб арышце. Завочных судоў у крымінальных працэсах няма».
Спікер пракуратуры таксама паведаміў, што ў Менск запыт аб выдачы фігурантаў справы не накіроўвалі, аднак невядома, ці будзе наогул такое хадайніцтва:
«Звычайна мы не паведамляем пра планы».
Чырвоная картка Інтэрполу — найстражэйшы дакумент у сістэме арганізацыі. З такім паведамленнем шукаюць падазраваных у здзяйсненні цяжкіх злачынстваў.
Раней юрыстка «WKB Lawyers» Ганна Маціеўская ў каментары «Белсату» адзначала, што вышук трох фігурантаў гэтай справы перакульвае да гары нагамі сітуацыю, калі цяперашнія ўлады Беларусі намагаліся затрымаць праз Інтэрпол палітычных апанентаў нібыта за непалітычныя злачынствы:
«Рэжым яшчэ не тэставаў супраць сябе Інтэрпол, не тэставаў, як іншыя краіны будуць падыходзіць. Можна разлічваць на Расею, яна не выдасць, але іншыя краіны, якія, можа, першы раз з гэтым сутыкнуцца, якія, магчыма, сябруюць з рэжымам, але — ёсць запыт, трэба разабрацца. Асобы могуць сутыкнуцца хаця б з часовым арыштам».
Такім чынам, у любой краіне-ўдзельніцы Інтэрполу (а іх цяпер 196) асобаў, якія ў вышуку арганізацыі, мусяць затрымаць і выдаць краіне, што ініцыявала пераслед.
«Максімум, што ім свеціць, — санаторый на расейскім курорце», — іранічна падсумавала Маціеўская.
Нагадаем, што пра завочны арышт беларускіх чыноўнікаў, датычных да захопу самалёту «RyanAir» ў Менску ў траўні 2021 года паведаміла «Gazeta Wyborcza». Следства распачалі ў Варшаве з тае прычыны, што лятак быў зарэгістраваны ў Польшчы, а сярод пасажыраў былі польскія грамадзяне.
Паводле звестак выдання, Акруговы суд у Варшаве завочна арыштаваў трох беларусаў, якіх абвінавацілі ў датычнасці да прымусовай пасадкі лайнера: тагачаснага кіраўніка «Белаэранавігацыі» Леаніда Чуро, кіраўніка палётаў гэтага прадпрыемства Яўгена Цыганова і афіцэра КДБ, прозвішча якога, як сцвярджаецца, вядомае польскаму следству, але пакуль не раскрываецца.
Іх абвінавачваюць у тэракце: захопе самалёту шляхам падману і незаконным пазбаўленні волі пасажыраў і экіпажа. За гэта пагражае да 12 гадоў турмы.
belsat.eu
