Набывайце, чытайце, дзяліцеся інфармацыяй.
1. «Ззянне» Стывэна Кінга (выдавецтва «Янушкевіч»)
Нават калі вы чыталі яго на іншай мове і бачылі кіно, нават калі вы не любіце Кінга – такога маштабу бестселер па-беларуску выходзіць не штодня. Шыкоўны пераклад Насты Карнацкай. Спадзяёмся, на гэтым чарга легендарнай замежнай літаратуры па-беларуску толькі пачынаецца.
Там жа можна прыкупіць «Ведзьмара» і «Валадара пярсцёнкаў»
2. «Ад 2 да 15. Мая мама ў турме» Вольгі Вялічкі (выдавецтва «Gutenberg Publisher»)
Кніга, якая выйшла недаравальна малым накладам, падымаючы тэму, пра якую амаль нічога не сказана, – дзеці палітзняволеных. Дзеці, якія бачылі затрыманні бацькоў. Дзеці, якія чакаюць бацькоў з-за кратаў. Што яны сняць, пра што мараць? Аўтарка Вольга Вялічка, сярод іншага, падняла пласт успамінаў дзяцей савецкіх лагераў. Так, будзе жудасна, але прачытаць варта.
Купіць тут
Неўзабаве з’явіцца аўдыяверсія!
3. Саша Філіпенка па-беларуску
Так, дагэтуль не сціхаюць спрэчкі з нагоды казусу, што беларускага аўтара пераклалі на беларускую. Так, гучыць вечнае пытанне: ці лічыцца беларускім аўтар, які піша па-расейску? Сутыкненне меркаванняў ніяк не скасоўвае факту, што ў кнігах апавядаецца беларуская гісторыя. Лаўрэата мноства літаратурных прэміяў Сашу Філіпенку называюць голасам сучаснай літаратуры. Ягоныя кнігі перакладзеныя сама меней на 15 моваў. Выдавецтва «Gutenberg Publisher» прэзентавала сёлета «Былога сына» і «Крэмулятар».
4. Выдавецтва «Тэхналогія» выпусціла сёлета «Чараўніка краіны Оз» Фрэнка Баўма
Фантастычныя ілюстрацыі Кацярыны Дубовік, легендарная гісторыя ў перакладзе Сержа Мядзведзева. Яшчэ адзін бестселер, які выдатна ўпрыгожыць калекцыю кніг, што хочацца гартаць і перачытваць.
Купіць тут.
5. А ці ёсць што зусім для дзетак, спытаеце вы. Вядома ж! Прапануем серыю вершаў Андрэя Скурко
Былы вязень пісаў вершыкі свайму сыну з-за кратаў. І вось цяпер гэтыя маленькія добрыя гісторыі для малечаў выйшлі ў друкаванай версіі з фантастычнымі ілюстрацыямі Волі Кузьміч (асцярожна, у дарослых таксама вялікія шанцы заліпнуць на малюнках). Акрамя таго, антывандальны варыянт друку, які вытрымае ўсё. Ёсць вершы пра машынкі – «Хто жыве ў гаражы». А таксама пра інструменты – «Стукі-грукі – што за гукі».
Акрамя таго, можна паслухаць на «Кніжным возе» галасамі Алега Гарбуза і Крысціны Дробыш!
Слухаць тут.
