Дамініканскія касцёл і кляштар у Смалянах хутка могуць знікнуць: дзяржава не зацікаўленая аднаўляць каталіцкую святыню.
Закінуты кляштар некалькі гадоў таму мясцовыя ўлады паспрабавалі знесці, на шчасце, тады менскім актывістам удалося абараніць помнік гісторыі. Аднак цяпер і касцёл, і кляштар стаяць без дахаў, а дзверы і вокны даўно згубленыя.
«Стан захавання касцёлу вельмі дрэнны: засталіся фрагменты скляпення і рэштка амвона. У некаторых вокнах засталася арыгінальная сталярка, але ўжо без шкла», – кажа архітэктар Зміцер Савельеў.
Пра рэстаўрацыю гаворкі не ідзе: калі дзяржава рана ці позна можа выдзеліць грошы на рэстаўрацыю замку ў Смалянах дзяржава, аднаўленнем касцёлу могуць заняцца хіба толькі каталікі, а іх тут практычна не засталося.
«Сітуацыя з касцёлам у Смалянах патавая: гэта Усходняя Беларусь – каталікоў там цяпер вельмі мала», – кажа гісторык Цімох Акудовіч.
Калі гэтак застанeцца і надалей, неўзабаве гэтыя помнікі гісторыі могуць быць страчаныя назаўжды.
«Мару, каб увесь цэнтр Смалянаў унеслі ў дзяржаўны спіс як ландшафтны запаведнік. Для гэтага патрэбная зацікаўленасць дзяржавы. Яе няма», – дадае Акудовіч.
ДД
