Дыўма Русэф
Сенат Бразіліі прагаласаваў за адхіленне ад пасады прэзідэнта краіны Дыўмы Русэф. Раней за імпічмент Русэф прагаласавалі бразільскія дэпутаты.
Вынікі галасавання ставяць кропку ў 13-гадовым кіраванні ў Бразіліі левай Партыі працоўных, сябрам якой зʼяўляецца адхіленая ад пасады прэзідэнт.
Дыўму Русэф вінавацілі ў маніпуляцыях з федэральным бюджэтам, каб схаваць маштабы фінансавых праблемаў у краіне. Ейныя крытыкі сцвярджалі, што прэзідэнт спрабавала закрыць дзіры дэфіцыту ў папулярных сацыяльных праграмах, каб павысіць шанцы на пераабранне на другі тэрмін у кастрычніку 2014 года.
Часова выконваць абавязкі прэзідэнта будзе Мішэл Тэмер. Прэзідэнцкі тэрмін Дыўмы Русэф меў скончыцца 1 студзеня 2019 года.