Украінскія вайскоўцы працягваюць контрнаступальныя дзеянні сама меней на чатырох участках фронту. Пра гэта заявілі аналітыкі амерыканскага Інстытуту вывучэння вайны (ISW).
Як адзначаецца, Мінабароны Расеі заявіла, што расейскія войскі адбілі абмежаваныя і лакалізаваныя наземныя атакі ЗСУ ў раёне Крамянной. Аднак украінскія войскі прасунуліся на 1,2 кіламетра падчас наступальных аперацыяў пад Бахмутам.
ЗСУ таксама працягнулі абмежаваныя контрнаступальныя аперацыі на захадзе Данецкай вобласці паблізу граніцы Данецкай і Запарожскай абласцей і дасягнулі тактычных поспехаў на гэтых напрамках.
Апроч таго, украінскія вайскоўцы працягнулі наземныя атакі на Захадзе Запарожскай вобласці. Там, паводле расейскай крыніцы, украінцы таксама маюць пэўныя поспехі.
Расейскі бок і шэраг заходніх медыяў сцвярджаюць, што вялікае контрнаступленне ЗСУ ўжо распачалося, аднак афіцыйны Кіеў абвяргае гэтыя звесткі. Разам з тым, актывізацыя баявых дзеянняў цяпер відавочная.
Актывізацыя дзеянняў ЗСУ назіраецца з 4 чэрвеня. У гэты дзень мілітарысцкія Z-каналы паведамілі пра ўкраінскія атакі на поўдні: каля сяла Новаданецкага (Валнавахскі кірунак, Данецкай вобласць), у раёне Навадараўкі і Вуглядару на Запарожскім фронце. Расейскі бок быў вымушаны прызнаць, што ўкраінцы здолелі ўклініцца ў першую лінію абароны. Таксама Z-каналы заўважылі актыўнасць ЗСУ ў раёне Аўдзееўкі і Мар’інкі (Данецкая вобласць).
Якуб Хруст belsat.eu
