Амбасада Беларусі паведаміла пра беларусаў, якія зніклі пасля землятрусу ў Турцыі
Амбасада Беларусі ў Турцыі паведаміла, што «ўстаноўленыя два выпадкі, калі беларусы не выходзяць на сувязь» пасля землятрусу. Дыпламаты ўдакладняюць інфармацыю ў мясцовых уладаў, піша пасольства ў сваім Twitter.
Беларуская амбасада ў Анкары «адсочвае сітуацыю з наяўнасцю беларусаў сярод пацярпелых у выніку землятрусу ў Турцыі». Паведамленне пра гэта з’явілася ў Twitter пасольства:
«Устаноўленыя два выпадкі, калі беларусы не выходзяць на сувязь. Пасольства падтрымлівае пастаянны кантакт з іхнымі сваякамі ў Беларусі, удакладняе інфармацыю ў кампетэнтных органах Турцыі».
Вядома, што ў горадзе Хатай (Hatay), які найбольш пацярпеў ад землятрусу, знікла беларуска Аляксандра Акпінар і ейнае дзіця. Муж знайшоўся ў шпіталі.
Сястра жанчыны распавяла, што апошні раз размаўляла з Аляксандрай увечары ў нядзелю, пасля гэтага на сувязь яна не выходзіла.
Напярэдадні беларус Дзмітрый, які жыве з сям’ёю ў Мэрсіне (Mersin) – турэцкім горадзе за 250 км ад эпіцэнтру землятрусу, – распавёў «Белсату», што не было SMS ці тэлефанавання аб насоўванні стыхійнага бедства, але адзначыў, што ў некаторых раёнах гораду ездзілі машыны з гукаўзмацняльнікамі і папярэджвалі пра землятрус.
«Страшна проста. Першы раз заспелі землятрус. Схапілі самае неабходнае – у машыну і «па тапках», як кажуць».
Паводле апошніх звестак, лік ахвяраў землятрусу ў Турцыі вырас да 2921, у Сірыі – да 1444. Пацярпелых у абедзвюх краінах – каля 19 500.
Сяргей Крот belsat.eu
